Empleadonan di Serlimar ta hopi hostina cu e ultimo declaracionnan cu a wordo haci pa Minister Arends 

Segun Diego de Cuba di STA

ORANJESTAD (AAN): Diego de Cuba, Presidente di Sindicato STA a duna di conoce cu e situacion di Serlimar ta un situacion bastante fastioso. Scuchando e ultimo declaracion di Minister Ursell Arends, De Cuba ta sinti cu e direccion cu e minister kier bay ta un direccion hopi diferente di locual tabata tin pensa.

            A agrega cu pa locual ta Serlimar, e empleadonan ta hopi hostina cu e ultimo declaracionnan cu a wordo haci pa Minister Arends. STA ta compronde e direccion cu e kier bay caminda cu kier bay coy tur e desperdicionan cu ta recicabel y laga nan wordo deposita na un lugar cu no sa ta unda.

            De Cuba a sigui bisa cu e miedo cu STA tin ta cu no ta mal idea, pero con severo e control ta bay ta. Pasobra si ta bay cera Parkietenbos con ta bay para cu e incinerator, cu desperdicionan humano y e cartanan cu tin cu wordo kima eyriba.

            "Loke ta duel nos mas hopi ta e pida caminda un negoshi di Serlimar, cu tabata genera 4 miyon pa aña, el a dal un buelta di 180 grado, awor el a bay den man di compania priva (...) y e compania aki ta citando 6 miyon pa aña. E mesun negoshi cu Serlimar tabata strica 4 miyon pa aña cu ne", a expresa.

            De Cuba ta puntra dicon minister no a bay profundisa su mes kico tabata pasando precisamente y pakico no a reactiva e negoshi ey pa e compania di Serlimar bek. Asina ta surgi e sentimento cu e gobernantenan mes kier mata Serlimar.

            A enfatisa cu Serlimar tin derecho di existencia y tin mas servicio cu Serlimar por duna, pero no ta laga Serlimar haci nan. Pesey e pregunta ta kico ta pasando precisamente.