ORANJESTAD (AAN): Monica Kock, Presidente di Camara di Comercio (KvK) a indica cu un di e ideanan cu gobierno a trece dilanti na Februari y cu el a reacciona riba dje caba,
pero cu awor ta mas defini ta e decision cu kier cu cada director di un compania mester tin un salario calcula di 4.166 Florin pa luna.
Kock a sigui bisa cu e director aki mester ta doño tambe di e compania. Esey kiermen cu si bo tin un negoshi chikito, locual hopi hende tin aki na Aruba, y si bo tin un entrada di 6 mil florin pa luna, e ora mira di esaki cu ta 3 mil florin, bo tin cu bay paga bo mesun salario. Pero ora bo ta paga un salario bo tin cu paga premie, AOV y esey ta hopi mas cu 3 mil florin. E resto di e placa cu bo tin den bo negoshi chikito, e resto bo tin cu paga bo awa, coriente y e no ta bay yega.
Monica Kock a indica cu tur hende sa cu ora cu ta bin cu salarionan asina bo negoshi mester ta bayendo hopi bon pa por carga e peso aki.
A agrega cu gobierno a tuma e decision aki keriendo of bisando cu e suma aki bo mester cobra como director. Realidad ta cu tur e tempo di Covid, hopi biaha ora cos ta bay malo, un doño di un negoshi hopi biaha ta paga su trahadornan si y su salario ta baha of e ta e ultimo cu ta wordo paga.
E preocupacion riba esaki ta cu 70% di e negoshinan na Aruba ta chikito of mediano. Kiermen cu si e doño mester bin riba un salario di 4 mil tin chens cu mester bay tuma un decision cu tin cu bay corta un otro caminda, a bisa.
Tin hopi pregunta den esaki y KvK ta kere cu esaki no ta un bon plan, pero gobierno ta bisa cu nan lo haci excepcion pa 'start-up'. Eynan e ta puntra pakico e 'start-up' si ta bay haya un excepcion y ta haya otro hendenan cu den tempo di Covid na unda por ta a busca un fiansa pa sobrebibi y pa por paga trahadornan.
Corda si bo ta director di mas cu un compania, esaki ta bay tin consecuencia hopi grandi pa hopi hende, Monica Kock a remarca.
