Empleadonan di La Cabana Beach Resort & Casino a haya un bunita sorpresa

ORANJESTAD (AAN):  General Manager Joe Najjar tabata tin un bunita sorpresa pa empleadonan di su resort ora cu el a haci un anuncio inespera siman pasa.

            Mientras cu e resort a drenta su delaster fase di e campaña ‘100 Days Of Celebrating U’ pa reconoce loke ta contribucion y trabao duro di tur empleado hibando e negoshi semper den rumbo di exito, hasta ora di ta pasando durante temponan financiero dificil, e hunta di director den consultacion cu team di maneho a aproba un suma di AWG 1,000 pa un certificado di regalo presenta na tur full-time empleado y supervisors pa wordo uza na Super Food.

            Durante ultimo añanan, e resort a aumenta nan sosten na comunidad den general y specialmente na su comunidad di empleadonan.
            E hunta di director y team di maneho a prueba un bes mas cu nan ta scuchando, e personanan aki ta mas cu djis empleado anto e resort ta mas cu djis un lugar di trabao. E ta un cultura di aprecio cu ta crea vacacionnan y momentonan memorabel pa tur envolvi.

            Cuidando otro ta hiba e cultura cu ta biba cu pasion, cu e forsa di integridad y regenera por medio di diversion. Un cultura cu ta basa na consistencia y semper siñando for di otro cu hopi aprecio.

            Mientras cu Najjar tabata brindando e bon noticia na su empleadonan, el a expresa e speransa cu e acto generoso aki lo por yuda balansa e retonan den aumento den costo di compras, aumenta recientemente por medio di aumento den costo di bida rond mundo.

            E gesto generoso no lo por ta posibel sin e gran compasion di e hunta di director na La Cabana y henter e team di maneho. E ultimo Diasabra, e resort a organisa un fundraising carwash, na unda managers a laba autonan di empleadonan. E car wash tabata exitoso cerando e campaña di ‘100 Days Of Celebrating U’.

            Loke a start manera un Housekeeping Week a continua na bira hiking y biking, cu General Manager, culminando cu un dia di famia na De Palm Island, un Benefit Fair y un bunita sorpresa cu un certificado di regalo pa djis nombra algun di e tremendo experiencianan durante e campaña cu a dura 100 dia largo.