ORANJESTAD (AAN): September ta luna pa duna atencion un biaha mas na nos monumentonan.
Despues di un Wiki Loves Monuments exitoso na 2020. Stichting Monumentenfonds Aruba ta bek cu e competencia di fotografia mas grandi na mundo cu e meta pa documenta monumentonan rond mundo.
Wiki Loves Monuments ta un competencia internacional di fotografia organisa pa Wikimedia. Wikimedia ta e organisacion tras di Wikipedia, e encyclopedia gratis y un colaboracion global sostene pa boluntarionan.
E competencia a inicia na 2010 na Hulanda, despues a expande pa Europa y mundo henter colectando asina informacion di 1,5 miyon monumento di 76 pais y mas di 1,7 miyon di fotografia entrega pa mas cu 600 mil participante.
E competencia ta consisti di un competencia nacional y un internacional:
Mas di cuarenta pais rond mundo ta organisa tur aña un competencia nacional cu nan propio reglanan y eventonan pero cu un tema en común; monumentonan.
Cada competencia nacional lo nomina nan ganadornan pa participa na e competencia internacional. E fotografianan aki lo wordo juzga pa un hurado internacional cu lo scohe e mihor imagennan entre tur e paisnan participante. Na 2021 Aruba no a organisa WLM pero a forma parti di e hurado internacional.
Herencia Cultural ta un parti importante di informacion cu Wikipedia ta collecta y comparti. Tur hende por aporta cu informacion pa medio di imagennan y of articulonan.
Un imagen ta bal mas cu mil palabra y asina aki un y tur por descubri e cultura, historia y significado cientifico di nan pais y comparti esaki cu mundo henter.
E aña aki pa di cinco ocasion Stichting Monumentenfonds Aruba lo organisa un competencia nacional.
E competencia lo tuma lugar na september entre 1 cu 30. Tin algun regla cu ta mara na e competencia manera entre otro e potret mester ta di autoria di e participante y na momento cu upload e potret ta entrega e derecho na Wikipedia pa uso liber.
Tur persona cu kier participa na Wiki Loves Monuments mester simplemente tuma un fotografia di un monumento di Aruba y load esaki via Wikimedia entre 1 y 30 di september. Ta hopi importante si pa e persona registra riba Wikimedia.
Despues di 30 di September un hurado local di 3 persona lo evalua tur e fotografianan y scohe esun ganador. Tambe lo nomina e mihor dies imagennan cu lo sigui participa den e competencia internacional.
