'Emotive Delirium' ta e solo expo di Dimanche-Jolie cu ta habri diaranson proximo na Biblioteca Nacional

ORANJESTAD (AAN); Dimanche-Jolie ta presenta su prome solo exposicion titula ‘Emotive Delirium’ na Biblioteca Nacional Aruba y

esaki ta habri diaranson awor di 5or pa 7or. E exposicion ta habri durante orario regular di biblioteca te dia 26 di juli 2025.

            Dimanche ta auto-didactico di tempo cu e ta chikito te cu su 13 aña y despues e ta sigui curso tras di curso na Ateliers ’89. Pa shete aña e ta sigui curso riba varios disciplina, pintamento, ceramica, moda, filmacion, dibuha, mixed media y e ta experimenta hopi. Su educacion diverso a forma su sensibilidad transdisciplinario y esey ta loke ta defini su bos artistico awo.

            Pa Dimanche, dibuha ta e raiz structural pa su expresionnan visual mientras cu poesia ta sirbi como e simiya pa su desaroyo musical, conceptual y di conta un storia.

            E exposicion ‘Emotive Delirium’ ta e culminacion di su proyecto di investigacion artistico titula ‘The Decomposition of the Trout, a symbolic exploration of how art shapes our emotional lives and how the self-imposed rules we live by often disconnect us from our essential nature’.

            Pa medio di nuebe cuadra, un coleccion di poema ritmico y un instalacion, Dimanche ta invita nos den un fluho di emocionnan poetico pa medio di imahen, curpa y sonido. Su obranan ta presenta un universo di simbolo.

            Publico ta bon bini pa bishita e exposicion aki y entrada ta gratis.