ORANJESTAD (AAN) – Evocando e palabranan di e prócer Jose de San Martin Minister Glenbert Croes a cuminza su discurso den cuadro di e celebracion di e Bicentenario di e Republica di Colombia, dia 28 di Juli awo, na Wilhelmina Park.
Jose de San Martin: “For di e momento aki Peru ta liber y Independiente door di e boluntad general di e pueblonan, e husticia di su causa cu Dios ta defende. Biba e Patria! Biba e Libertad! Biba e Independencia”.
Minister Glenbert Croes a sigui expresa: “Awe nos, como Arubiano tambe, den nomber di e pueblo aki y tambe di Gobierno, ta celebra e dia aki cu bosonan. Nos ta honra tur e Peruanonan na Aruba y rond mundo. Nos ta honra e gran patria aki, Peru y su digno pueblo. Pasobra boso a bira ehemplo, manera e Pastor a bisa, di entrega, trabao, respet y convivencia. Boso a pone e nomber di Peru riba e mapa mundial cu su cultura, cuminda, historia di cual nos tur ta fanatico.
“Y como Arubiano, tambe den nomber di Gobierno y di e pueblo aki, cu tanto sentimento y afecto tin pa e pueblo Peruano, nos ta honra e historia di independencia aki, di lucha, pa awe ta hiba nos celebra e Bicentenario di e Independencia di Peru, pasobra tambe e historia libertado aki, na Peru, Ecuador, Bolivia, Colombia y Venezuela ta inspirado pa e caminda di libertad cu nos a encamina na Aruba.
Aruba ta un isla chikito, pero semper cu e soño di kier ser Patria y awe nos ta.
“Ora mi ta bisa cu nos ta honra e historia aki, pasobra obviamente como yiu nos a mira con e historia di e caminda pa libertad, entre otro, di e procernan di Latinoamerica manera Jose de San Martin y tambe Simon Bolivar a bira inspirado pa nos Libertador na Aruba.
Pesey awe, nos ta honra e gran dia aki pa tur e Peruanonan, pasobra nos ta sinti nos mes un solo pueblo. Nos tur ta sinti Peruano y mi ta akinan, den mi funcion como Minister di Gobierno di Aruba, pa bisa tur Peruano DANKI pa tur loke boso a haci tambe pa e pais aki.
“ E Peruanonan igual cu e Colombianonan, Venezolanonan, Ecuatoriano, Dominicano, aki nos tin personanan descendiente di Suriname y Filipinas, y nan tur a contribui na e construccion di e Isla aki cu nos ta yama nos Patria, su Patria, pasobra e Peruanonan ora nan ta na Aruba, ta Arubiano. Y nos, ora nos bay Peru cu Dios kier lo ta pronto, nos lo sinti Peruano. Nos ta un solo pueblo y cu e sentimento aki di un solo pueblo nos lo sigui cana e caminda aki semper honrando su descendencia, su origen, su historia, y gradiciendo tur loke boso nifica pa nos. Biba Peru, biba su Independencia, biba e libertad di e gran patria Peruano cu awe nos ta honra. Felicidades!”, e dignatario a conclui.
