ORANJESTAD (AAN): Lisette Gomes di Comision contra Abuso Sexual di Menor (Commisie Sexueel Misbruik van Minderjarigen) a duna un declaracion na prensa despues di a tene un reunion diaranson cu Formador di Gobierno Evelyn Wever-Croes.
Gomes a laga sa cu e reunion a bay bon. Esaki toch ta un tema dificil pa papia di dje ya cu abuso sexual di mucha ta afecta comunidad den un manera hopi negativo.
Como presidente di e comision, hunto cu Dr. Ordoñez y Sra. Engelbrecht a presenta nan plan pa e proximo 4 aña y kico nan kier bin cu ne.
Entre a papia di un servicio di un number di telefon 24/7 pa casonan di abuso pa henter comunidad por yama. Tambe a papia riba leynan cu mester wordo cambia y servicionan extra cu mester bin y tambe riba e parti principal cu ta e parti di prevencion, Lisette Gomes a señala.
Tambe a reuni cu Formador Stichting End Child Abuse. Mijenou Tromp a duna su declaracion na prensa indicando cu nan ta haya cu e castigonan pa loke ta abuso di mucha no ta apto ainda y manera deber ser.
A reuni cu Formador pa por a discuti tur e puntonan unda e sistema ta fayando e victimanan. Tur e 'bottle necks', unda por mehora pa asina por ta consciente di tur e problemanan cu ta existi y unda tin fayo.
Tromp a agrega cu e fundacion kier pa esaki ta den mente di e gobierno nobo y pa esaki ta un prioridad pa no re-victima e muchanan cu ta pasa door di e abusonan aki, pero pa e sistema acoge nan y traha na nan bienestar, a enfatisa.
E stichting ta habri pa traha den samenwerking y ya caba tin un aña ta trahando como ombudsman inoficial pa e isla guiando e victimanan y canando e caminda cu ta hopi dificil door cu e informacion pa yuda nan mes no ta publico. Esaki tambe nan ta bringa pa cambia y empodera e personanan cu mas informacion pa yuda nan mes, a indica.
