Emilly-Anne Andrews corona como Miss Teen Aruba International 2023

ORANJESTAD (AAN): Diasabra anochi a tuma lugar den Cas di Cultura, e anochi final di e certamen di Miss Teen Aruba International 2023,

y esaki a culmina pa 11:12 pm, ora cu maestro di ceremonia George Winterdaal a anuncia e dama hoben Emilly-Anne Andrews como ganadora maximo di e certamen.  E corona a wordo transferi for di e ganadora di aña pasa Anais Thiel door di Miss Aruba 2022, Kiara Arends, kende e ora a pone e corona riba cabez di Emilly-Anne Andrews.

   Ademas di e titulo di Miss Teen Aruba International 2023, Emilly-Anne a obtene titulo tambe di Miss Fotogenica, Miss Popular, Miss Teen Best Smile, Miss Teen Best Makeup, Miss Teen Best Skin, y a bira Miss Teen Kok Optica Imagen Local.

   Na di dos lugar a keda Eimy Contreras, kende ademas a gana premio di Miss Teen Elegancia, Miss Teen Best Hair, y tambe Miss Teen Best Hairdo.

   Na di tres lugar tin Kasey Anne Kock, kende ademas a gana premio di Miss Teen Setar, Miss Teen Ella’s Accessories, y tambe Miss Teen Disciplina.

  Demas finalistanan tabata Glairis Feliz Segura kende a gana premio tambe di Miss Teen Spirit y Miss Teen MITA Eyewear.  Otro finalista ta Gilari Carvillo, kende alabes a gana premio di Miss Teen Model.

   E anochi aki, tur candidata a subi escenario cu mesun trahe deportivo, y mesun trahe di gala bisti, pa asina iguala e veld mihor pa cada candidata.  Palabra di pabien na Emilly-Anne Andrews.