Shurman Milliard di Telefon pa Hubentud:
ORANJESTAD (AAN)-- Shurman Milliard, di Fundacion Telefon pa Hubentud (131), a splica den un entrevista cu Matutino DIARIO, cu e uso di IA, y e rednan social en general, tin di haber cu varios motibo, sea positivo of no positivo. E por ta relaciona cu estudio of un situacion emocional, entre otro.
Esaki ta parti di locual lo elabora riba dje durante e conferencia CHI (Child International Helpline) na Bogota, cu a cuminza dia 22 di September awo.
Shurman a splica cu tur e factornan cu ta pone e hobennan uza IA, por ehemplo, ta link na otro. “Na momento cu nos ta mira con nan ta use na un manera positivo of negativo, esey tin un efecto riba nan sentimentonan emocional, y tambe esey por walk bek den e comunidad.
“E ta manera un circulo, y esey nos kier wak na unda nos por pone informacion dirigi un tiki mas, anto haya informacion pa den futuro nos no cay atras. Ya, nos ta un sector preventivo, nos ta purbando pa yuda hende prome cu e problema bira grandi cu nos mester y haci hopi cos pa e situacion mehora. Un lema hopi importante pa 131 ta cu “nos mester haci algo prome cu bo haya un herida, anto door di conferencianan asina, nos ta yuda no solamente e otro paisnan pero vooral nos comunidad”, Shurman Milliard a señala.
Milliard a subraya cu 131 a trece diferente proyecto, tocante e problemanan cu tin den nos hubentud, manera problema mental, of desgano pa studia, y esey no ta algo nobo pero nan kier wak den futuro kico ta bay sosode.
“Kico nos ta haciendo di awo caba, door di duna charla, leiding, desde e momento cu nos ta papia di termento un pida di IA tey caba, tin Cyber Bullying, algo cu pa 15 aña caba nos tin hopi informacion y nos ta duna e medionan esaki, desde e momento cu nos ta papia di nos emocionnan. Riba dje nos a duna dos charla, dos tayer di trabao, IA t’aden caba. Esey ta e topiconan cu nos ta bay papia di dje, pero cual ta e maneranan pa papia y informa tocante di Social Media, IA, y nos sentimentonan mental nos tin esey caba. Pero nos kier wak con den futuro nos por haci esey y sostene otro cu no t’asina adelanta manera nos ainda” Shurman Milliard, di Fundacion Telefon pa Hubentud a remarca.
