Embehecemento di poblacion a causa un revision riba e potencial di cada departamento di Wit Gele Kruis

Jetty Wever - POH di Wit Gele Kruis

ORANJESTAD (AAN): Jetty Wever - POH di Wit Gele Kruis (WGK) a indica cu nan a haya dos studiante for di Amsterdam y nan a pasa den diferente departamento di WGK y a asina haci un investigacion tocante e potencialnan di cada departamento, y e resultado di e investigacion, nan a haci un analisis y presenta esaki den un rapport.

Wever a splica cu desde comienso di nan existencia, WGK tabata enfoca riba cuido di mucha, pero mirando e problema di embehecemento di e poblacion, nan kier a haci un revision riba e potencial di cada departamento y asina mira e necesidad den comunidad y cuido di Adultonan Mayor.

Segun Wever, e  rapport a mustra cu Aruba ta den un bon direccion den cuido, aunke aki aya mester haci algun ahuste, pero ta cambionan realistico cu por wordo soluciona pa yega na e miho resultado.

E rapport ta indica e cambionan cu WGK mester tuma pa por funciona optimalmente pa cuido di Adultonan Mayor. Esaki ta inclui educacion, material, traha hunto y conecta e departamentonan na otro. E rapport a wordo entrega na director nobo di WGK, pa asina e por tin un bista riba e situacion actual y cu e por aporta na e politicanan cu mester wordo implementa den WGK.

Wever ta contento di por bisa cu e departamentonan ta funcionando bon, pero semper tin cosnan cu nan por traha pa mehora e servicio.