ORANJESTAD (AAN) Despues di a enfrenta adiccion desde su hubentud, Elvis Paesch a transforma su bida y
a dedica su mes na trabao pastoral na Surinam y Ecuador. Awor e ta bek na Aruba pa comparti su historia durante e concierto Aruba Uni pa Un Speranza Nobo, dirigi na personanan cu ta enfrenta adiccion, nan famianan y comunidad en general.
Durante un entrevista cu DIARIO, Paesch a conta cu su contacto cu alcohol a cuminsa cu apenas diez aña. Cu diesdos aña el a uza cocaina pa prome biaha, y cu diestres aña el a cuminsa falta scol y traha pa traficantenan di droga. Den e periodo ey, el a frecuenta Rancho, caminda e tabata uza droga hunto cu otro personanan conoci.
Cu diescuatro aña, adiccion na droga y alcohol ya tabata domina su bida, y el a keda deteni pa prome biaha. Entre diescuatro y diesseis aña, el a stop di bay scol, a descuida su curpa y tabata pasa cada biaha mas tempo riba caya. El a menciona cu, durante e periodo aki el a keda deteni ocho biaha y a ricibi un condena di dos aña.
Paesch a señala cu influencia di mal compañia a contribui na e caminda cu el a tuma desde un edad tempran. Riba caya, el a bira conoci cu e apodo “Bebe Lechi”. Awendia, sinembargo, e kier pa comunidad conoce Elvis Paesch como un testimonio cu transformacion ta posibel.
“Bebe Lechi a muri”, el a expresa, referiendo na e etapa di su bida cu el a laga atras.
Un cambio decisivo a cuminsa cu su diessiete aña, ora cu, durante un intento pa busca placer na Merca, un señora Mericano a papia cu ne tocante Cristo. Segun Paesch, esaki tabata e prome biaha cu el a ricibi e mensahe tocante Cristo. Cu diesocho aña el a comberti na cristianismo, y un aña despues el a cuminsa predica, compartiendo su fe prome cu su amigonan.
Na aña 2000 el a inicia su ministerio. E prome cinco añanan el a establece na Surinam, prome cu el a sigui su trabao na Ecuador, caminda awor e ta cumpli bintiun aña di servicio. A pesar di su trayectoria den exterior, Paesch a enfatisa cu nunca el a lubida Aruba, e isla caminda el a conoce tanto bida riba caya como e realidad di adiccion.
Su regreso ta carga cu e deseo di acerca esnan cu ta atravesa situacionnan similar y comparti un mensahe di fe y speranza cu nan y nan famianan.
E concierto Aruba Uni pa Un Speranza Nobo lo tuma luga dia 30 y 31 di october, cuminsando 7:00 di anochi, riba e tereno di parkeer di ex Texas Furniture Store, banda di ex-The Music Box. Entrada ta completamente gratis.
Paesch a splica cu e escogencia di e lugar ta relaciona cu e luga na unda e personanan den situacion mas vulnerabel ta frecuenta, particularmente esnan cu ta enfrenta adiccion. E ta invita henter comunidad pa forma parti di e encuentro.
