Segun Psicologo di Respaldo Misha Raymond:
ORANJESTAD (AAN) Un mucha cu ta hunga, ta un mucha cu ta desaroya. Tanto lesamento como weganan y actividadnan digital por contribui na e proceso aki, semper cu nan ta adapta na edad, necesidad y bienestar di cada mucha. Esaki ta e mensahe di Misha Raymond, GZ-psicologo di mucha y hoben na Respaldo, kende ta enfatisa e importancia di un combinacion balansa y guia di mayornan.
Segun Raymond, entre cuatro y cinco aña, muchanan ta desaroya habilidadnan cognitivo cu ta yuda nan compronde miho loke nan tin nan dilanti. Den e proceso aki, buki, co’i hunga y tecnologia por ofrece diferente oportunidad pa siña y explora.
El a splica cu prohibi uzo di aparatonan digital completamente tambe por tin consecuencia, ya cu esaki por limita participacion di e mucha den un realidad social cu tecnologia ta forma parti di dje. Sinembargo, acceso na un aparato mester bay acompaña pa orientacion y reglanan cla.
Lesamento, di otro banda, ta contribui na desaroyo di lenga, un area cu, segun Raymond, ta representa un reto grandi na Aruba. Lesa buki no solamente ta amplia vocabulario y yuda muchanan compronde con palabra y frase ta forma, sino tambe ta stimula nan capacidad pa pensa, interpreta y expresa nan mes. E habilidadnan aki ta forma un base importante pa nan desaroyo.
Raymond ta considera cu un combinacion di buki, co’i hunga y actividadnan digital adecua por contribui na un desaroyo mas integral. Cada uno ta ofrece experiencia y oportunidadnan diferente, y ta importante pa muchanan por explora esakinan cu e guia necesario.
E psicologo a subraya e importancia pa tene esakinan den balance. Mayornan mester stimula lesamento y wega, mientras nan ta guia uzo di tablet y otro aparato digital. Esaki ta inclui determina ki contenido ta apropia, na ki momento introduci e aparato y cuanto tempo e mucha por uza esaki.
Finalmente, Raymond a destaca cu uzo excesivo di aparatonan digital por tin implicacion pa bienestar psicologico, cognitivo y fisico di muchanan, entre otro nan bista. P’esey, el a enfatisa e importancia di orienta mayornan, pa nan por compronde e posibel efectonan y stablece limitacionnan cu ta sostene un desaroyo sano y balansa.
