Audrey Croes, PR di NV ELMAR:
ORANJESTAD (AAN) – Relacionista Publico di NV Elmar, Audrey Croes, a reitera den entrevista cu DIARIO, cu e compania tin un combinacion, cu ta consisti di un plan acelera di mantencion pero tambe un strategia, pa e temporada aki di calor.
Manera Croes a splica caba, ELMAR a parti e load den diferente cabel, pa no tin cabel stand bay, numa cu tur dos ta carga un load mas abao; tur esaki mas otro esfuerzonan cu ELMAR a haci ta pa yuda den temporada di calor.
Audrey Croes ta contento cu e tema aki, di temporada di calor, a bira algo cu ta papia mas over di dje, y cu ta duidelijk cu nos tin un temporada di calor y un temporada fresco.
“Pa mi esaki ta e prome stap, e ora ey, di concientizacion, cu nos tin un cambio cu nos tin cu atende cu ne. E ta algo cu hunto, den comunidad, nos tin cu atende den temporada di calor, nos tin cu wak kico nos tin cu haci rond di nos cas, pa nos por refresca nos cas, pa nos ta mas conciente cu nos coriente, paga aparatonan cu no ta den uzo, naturalmente kedando toch fresco y safe”, Audrey Croes, PR di NV Elmar a remarca.
