Minister di Husticia, Arthur Dowers
ORANJESTAD (AAN): Recientemente, Minister di Husticia, mr. drs. Arthur Dowers, a hiba un combersacion cu sra. Jeanette Richardson-Baars, hefe di CMMA (Coördinatiecentrum Mensenhandel Mensensmokkel Aruba), tocante e lucha intensivo contra traficacion humano y contrabanda di hende na Aruba.
CMMA ta sirbi como e punto central di contacto na Aruba pa casonan relaciona cu traficacion humano y contrabanda di migrantenan. E centro tin tres meta principal: pa informa, educa y duna asistencia na nivel nacional riba e temanan aki. Segun Minister Dowers, e papel di CMMA ta esencial den e red di proteccion cu Aruba tin pa defende derechonan humano y preveni explotacion ilegal.
Ta importante pa sa cu CMMA no ta un instancia di investigacion ni persecucion. E centro ta enfoca exclusivamente riba reforsa conocemento, formacion y sosten y ta raporta casonan sospechoso tanto na nivel nacional como internacional.
Sra. Richardson-Baars a pone enfasis riba e necesidad pa crea conscientisacion den comunidad tocante e diferencia crucial entre traficacion humano y contrabanda di hende.
- Traficacion humano ta un atrocidad unda hende ta move ilegalmente for di un pais pa otro, hopi biaha contra nan boluntad, y ta inclui manipulacion, menasa, y explotacion.
- Contrabanda di hende, den otro banda, ta un situacion unda personanan ta sufri abuso laboral of ta haya nan libertad limita, sin necesariamente ta involvi cu traficacion.
Ta vital pa defini e diferencia entre e dos concepto pa por detecta y actua si ta surgi un situacion sospechoso. Pa yuda cu esaki, CMMA tin disponibel un tipline confidencial pa hende cu kier haya mas informacion of pa raporta actividadnan sospechoso relaciona cu traficacion humano of contrabanda di hende.
Pa mas informacion, por bishita www.habribowowo.com, un plataforma cu ta contene detaye esencial pa yuda identifica, preveni y combati e fenomenonan aki.
Minister Dowers tin total confiansa den e labor di CMMA y a reafirma cu Gobierno lo sigui duna sosten structura pa e centro por sigui cumpli cu su tareanan den manera eficaz y sostenibel.
