Elmar su Electra Discovery Tour ta bek na YMCA San Nicolas

ORANJSATD (AAN):  N.V. Elmar a continua su Electra Discovery Tour 2026 cu un bishita na YMCA San Nicolas,

como parti di su programa di Corporate Social Responsibility y e campaña educativo Switch On Safety.

   Pa segundo aña consecutivo, Elmar ta organiza Electra Discovery Tour, un roadshow educativo cu ta combina siguridad electrico, educacion y entretenimento. Durante e bishita na YMCA San Nicolas, e muchanan a disfruta di un Poppenkast show di Chispito, presenta den colaboracion cu Scol Teatro Aruba TRIBI.

   E show, cu ta forma parti di e campaña Switch On Safety, ta presenta diferente regla importante pa preveni accidente relaciona cu coriente y pa stimula uzo responsabel di energia. Pa medio di un formato interactivo y accesibel, e muchanan ta siña con nan por aplica e mensahenan di siguridad den nan bida diario.

   E bishita na YMCA San Nicolas ta continua e relacion existente entre Elmar y e organizacion. Aña pasa, Electra Discovery Tour a bishita YMCA San Nicolas tambe, mientras cu Elmar ta colabora cu e organizacion den e workshop “Klik y Siña”, dirigi na adultonan mayor.

   Durante e actividad, e muchanan di YMCA San Nicolas tabata e prome participantenan cu a ricibi e figurin oficial di Chispito. E packaging di e figurin tin diferente mensahe relaciona cu siguridad electrico.

   Cu e figurin, Elmar kier ofrece famianan un instrumento educativo cu por yuda nan sigui conversa y practica siguridad electrico hunto na cas.

   Electra Discovery Tour 2026 a inicia na Stichting Ambiente Nobo na Santa Cruz y a continua na YMCA San Nicolas. Durante e proximo simannan, e roadshow lo bishita mas Summer Camps den diferente distrito rond di Aruba.

   Cu Electra Discovery Tour y e campaña Switch On Safety, Elmar ta sigui comparti informacion importante tocante siguridad electrico di un manera educativo y accesibel pa muchanan y nan famianan.