Elmar a lansa su programa educativo ‘Electra Discovery Tour pa Muchanan’ rond di e isla

ORANJESTAD (AAN): Durante vakantie escolar, a haci bishitanan educativo y interactivo riba electricidad na diferente “kids camp”,

cu a cuminsa awe na Centro di Bario Noord.

   E tour ta dirigi na muchanan di edad di scol basico pa, den un forma captivante, conoce cu e concepto di electricidad y con ELMAR ta distribui coriente rond nos isla.

   E bishita educativo tabatin 4 “stations” interactivo:

- Un wega electrico: Diversion practico pa cuminsa compronde fluho y circuito electrico

- Experiencia di scucha kabelnan subteraneo: Descubri cu parti di e red di coriente ta bou tera y siña riba mantencion di un red di coriente

- Subi den bucket truck: Biba experiencia di un Lineman di ELMAR trahando riba liña di coriente

- ELMAR balloon giveaway: Como recuerdo, cada mucha ta ricibi un balon di ELMAR pa inspira nan como e siguiente generacion di tecniconan y ingenieronan.

Awe tabata e prome bishita di e tour. E siguiente ta programa na YMCA Dakota, Hospi Bondi Camp na Eagle, YMCA San Nicolas, y e tour ta finalisa na ELMAR Oranjestad.

E iniciativa aki ta parti di esfuersonan continuo di ELMAR pa conecta cu diferente grupo, inclui clientenan, adulto mayor y awor muchanan, pa stimula un amor pa energia y ingenieria den hubentud Arubano.

Danki na Centro di Bario Noord pa habri porta pa ELMAR. Un gradicimento special tambe na nos Team di Grid Quality Management, nan dedicacion na e proyecto aki ta haci posibel cu nos por duna e muchanan un experiencia sigur, educativo y involvidabel durante nan vakantie escolar.