Misha Raymond:
ORANJESTAD (AAN): E cantidad di ora cu muchanan ta pasa dilanti un pantaya no ta e unico factor cu merece atencion. E edad y e contenido cu nan ta wak, na cual nan ta wordo exponi na dje y e falta di limitacion y guia tambe ta hunga un rol importante den nan desaroyo y comportacion. Asina Misha Raymond, GZ Psicologo di Mucha y Hoben na Respaldo, a duna di conoce durante un entrevista cu DIARIO, haciendo referencia na resultadonan di estudionan reciente.
Segun Raymond, Aruba ainda no tin un maneho of protocol uniforme pa orienta e uzo di pantaya pa nos muchanan. Mientras localmente ainda ta formando un bista riba con pa atende cu e tema aki, na nivel mundial ya ta tumando pasonan pa establece guianan y limitacionnan.
El a señala cu, como un comunidad chikito y vulnerabel, Aruba ta enfrenta e reto di sigui e desaroyonan tecnologico cu ta avansa rapidamente. Esaki ta exigi atencion, tanto pa compronde e cambionan como pa atende cu e efectonan cu nan por tin riba muchanan y hobennan.
Un di e preocupacionnan ta e exposicion na contenido agresivo, entre otro den weganan digital, na un edad mucho tempran. Segun Raymond, sin e debido guia y supervision, muchanan ta keda interpreta y forma nan propio opinion tocante material cu nan ainda no ta prepara pa compronde. El a enfatisa cu esaki por trece riesgonan pa nan desaroyo.
Raymond a splica tambe cu e tempo cu un mucha ta pasa dilanti pantaya no tin di haber solamente cu su interes den e contenido, sino tambe cu e manera cu e ta ocupa su tempo liber. Ora uzo di pantaya ta ocupa cada biaha mas espacio den bida diario, por keda menos oportunidad pa contacto social y otro actividadnan cu ta contribui na un desaroyo ekilibra.
P’esey, segun e psicologo, e discusion mester bay mas leu cu solamente conta oranan of limita cierto contenido. E pregunta central ta con pa guia muchanan y crea e condicionnan necesario pa sostene nan desaroyo, bienestar y comportacion.
“E desaroyo ta hopi preocupante. Muchanan ta bira adicto na pantaya. Si bo kita un pantaya di un mucha, nan ta responde cu mal comportacion. Y si mayornan kita internet, nan mundo ta caba. E muchanan no ta funciona si no tin internet y te hasta ta lanta contra nan mayornan”, Raymond a remarca.
E situacion ta subraya e necesidad di un solucion comun, cu guianan cla y practico pa mayornan, scolnan y profesionalnan. Un maneho uniforme por duna direccion na e uzo responsabel di pantaya y sostene mayornan den e tarea di establece limitacionnan. E meta ta pa muchanan siña uza tecnologia di un manera cu ta contribui na nan desaroyo, cu suficiente espacio pa contacto social, actividad y un bida diario ekilibra.
