Elite K9 Club ta trahando cu e vision di conscientisa e doñonan di cacho

ORANJESTAD (AAN): Elite K9 Club a wordo funda na 2017 cu e vision di bin cu algo apart y diferente pa yuda conscientisa e doñonan di cacho pa ta mas activo cu nan mascota y no djis duna nan cuminda y lag’e para den cura of cera.

            Desde aña pasa 2020, a cuminsa cu eventonan pa e mascotanan. Den pasado por corda cu tabatin “fun dog walk” cu tabata un exito completo. Elite kier a bin cu algo diferente. Elite a cuminsa cu entrenamentonan di obediencia pa cachonan di rasa of crioyo, sin ningun excepcion.

            Despues di par di luna a topa cu varios geleider cu Herdernan cu hopi energia. Despues di basta reunion y evaluacion, a dicidi di cuminsa cu un programa special pa e tipo di cachonan aki mirando e conocemento y experticio den e ramo di cachonan pa trabao.

            Elite a bin cu entrenamento pa cachonan cu ta sport y/of bitework cu den realidad no ta algo nobo, mirando cu na diferente parti mundo e sport aki ta activo. Por ehempel na Francia tin e French Ring, Belgium Ring na Belgica. Hulanda ta conoci pa su KNPV y Alemania pa Schuzthund.

            Kico ta e beneficio di bitework pa e tipo di rasa aki? Pa e cachonan cu ta agresivo of fada, e ta haci nan mas tolerante y menos tenso y evita cu nan lo baha nan agresividad den cas of den publico y/of riba un persona. Bitework ta siña un cacho controla su impulso, pa tin mas pasenshi y ta mas enfoca.

            Un persona cu no tin conocemento di esaki, no por tin conocemento di cacho. Un cacho no ta pa tira den cura, brasa y duna awa y cuminda so. E ta bay hopi mas leu cu esaki.

            Hopi persona tin problema na cas, paso cacho ta kauw tur cos den cura y/of den cas. E motibo di esaki ta, cu nan ta baha nan frustracion y nan energia riba obhetonan y hasta tin biaha riba hende, mirando cu henter dia nan ta para y no ta haci nada mas cu come y bebe awa.

            P’esey ta sumamente importante pa cana, train y haci weganan cu por reta nan mentalmente. Pa asina nan por keda fit, gasta nan energia na un manera positivo pa evita e tipo di stress aki.

             Hopi biaha nan ta wordo acerca door di doñonan cu cachonan agresivo cu no ta wordo acepta na otro scolnan, pa mesun motibo di agresividad. Pakico ta importante pa tuma cachonan brabo? Paso si no coregi nan comportacion, nan por bira un peliger pa otro cachonan y/of otro persona.

            Aruba no tin problema solamente cu cachonan riba caya, sino tambe problema di alcohol, droga y personanan ignorante cu no tin e conocemento di working dogs y/of sport dogs. E cachonan no ta wordo maltrata ni ta wordo entrena pa bay guera.

            Ora ta papia di test nan den luz of zonido ta referi na e parti social di e mascota. Hopi biaha cachonan tin miedo riba caya, entre otro di auto, brommer, zonido drukte, etc. Locual ta haci ta sali cu nan riba caya y duna nan e siguridad pa no tin miedo di e cosnan aki.

            E aña aki Elite a duna mas cu cincuenta demostracion pa scolnan, camping, daycare, Imelda Hof, Orthopedagogisch Centrum, Fundacion contra Violencia Relacional, FAVI, Sonrisa, Trampolin pa Trabou y otro instancianan.

            Nan demo team ta consisti di dos cacho crioyo, un scapa di Kill Cage y e otro adopta for di un fundacion. Tambe dos Herder cu ta haci e parti sport, mucha ta haya chens di cana cu e cachonan aki tambe.

            Tin ta bisa: un bon cas, awa, cuminda, training, doctor, tempo y hopi biaha nos ta bisa nan cu un cacho mester di hopi tempo, amor y cariño. No busca un cacho djis paso e ta chikito anto ora e bira grandi no ta worry mas cu ne.

            Tambe ta bon pa sa cu Elite, ademas di duna demo na scol y conscientisa nos muchanan. No solamente den e parti di cacho, pero tambe den e parti di alcohol y droga. Elite ta conta cu su propio USAR team. Urban Search and Rescue Team. Esakinan ta Cacho cu ta entrena pa busca hende perdi den mondi of den caso di calamidad.

            Den mas cu un ocacion nan voluntarionan a sali den busca di hende perdi. E no ta algo desconoci pa comunidad cu e instructornan tin nan trabou y ta forma parti di KPA. Cada un tin añanan ta dedicando na comunidad, sea den trabao of cu e club.

            Elite K9 Club tambe tin programa pa conscientisa comunidad pa ta doño responsabel di nan mascota. Tin contacto cu diferente veterinario y organisacion.

            Elite K9 Club ta haci hopi trabou voluntario y alabes nan mesun trabao. Ta yuda tur caminda cu por.