Como 130 mata a wordo planta den cunucu

ORANJESTAD (AAN): Recientemente e organizacion di ‘Trees for Aruba’, cu ta promove su mes tambe como ‘Ban Lanta y Planta’, cu yudanza di e damanan di SVT (Sociaal Vormings Traject),

hunto cu voluntarionan di Grand Thornton, Park Rangernan di Parke Nacional Aruba, hunto cu esnan di Marinierskazerne Savaneta, a bay den mondi, y a planta 130 mata.  Esakinan ta palonan di mata di Aruba!

   Nan a haci esaki pa stimula biodiversidad den un pida cunucu cu ta consisti mayoria di matanan di Hubada y Kwihi.

   Nan a usa 60 di e asina yama cahanan di planta ‘Groasis’, y a usa e metodo di ‘Tubo y Botter” den cual un tubo ta permiti nan muha e raiza di e mata, envez cu awa ta djis yega na e superficie mas halto di e tera.

   Rond di e matanan cu nan a planta, a pone gordura pa asina mantene e raiznan mas fresco y preveni evaporacion.

   Nan lo mester di awa dos biaha pa siman prome cu cuminza reduci awa gradualmente te ora cu nan raiz a pega bon eybao.

   A planta matanan di Kibrahacha, mata di Druif, mata di Palo di Colebra, Mahawa, y tambe Seida Cora.

   E meta di ‘Trees for Aruba’ ta pa yega na planta 10.000 mata na Aruba.  Door di planta mata, bo ta restaura e eco-sistema di Aruba, yuda combati cambio climatico, ta suministra cuminza y shelter pa parhanan, y crea mas sobra y evita cu tera ta sigui pasa den erosion.

   DIARIO ta felicita e organizadornan cu e empuhe aki.  E potretnan aki ta pa cortesia di e website di banlantayplanta.com