Ehemplar di buki nobo pa mucha ‘Papi tin kolibrí’ entrega na Biblioteca Nacional

ORANJESTAD (AAN): Autora sra. Denise de Jongh-Rekwest for di Boneiro a haci entrega oficial di algun ehemplar di su buki nobo pa mucha ‘Papi tin kolibrí’ na Biblioteca Nacional Aruba.

sra. Denise de Jongh-Rekwest a biaha bin Aruba specialmente pa contribui na e ambiente di fiesta di buki pa mucha. Sra. Astrid Britten, directora di Biblioteca Nacional Aruba a ricibi sra. Denise de Jongh-Rekwest na e ocasion special aki. Denise a participa diferente biaha na e Festival di Buki pa Mucha na Aruba. Denise a trece basta buki ‘Papi tin kolibrí’ pa parti na scol na Aruba.

‘Papi tin kolibrí’ ta un buki cu ta laga mucha cera conoci cu e profesion di Curandero y alabes tene esaki bibo. E buki ta duna atencion na hendenan cu tin un don pa cura hende cu remedi natural: Curanderonan.

Denise de Jongh-Rekwest a skirbi diferente buki pa mucha caba entro otro ‘Bin, bin, sigui mi submarin’ y un serie di buki pa mucha tocante di etiketa 'Etikèt i krokèt di Kaylee'. 'Kaylee ta haña klòmp', 'Kaylee, reina di karnaval'. Nan ta na Papiamentu y Hulandes. Ademas Denise a contribui cu storia na diferente buki. Denise ta edita y publica buki via su Cas editorial. ‘Papi tin kolibrí’ a keda ilustra pa Timothy Lampe.

Denise a bishita biblioteca compaña pa señora Glenda Tromp-Geerman, yiu di curandero Maria Geerman-Britten cu a duna un aporte na e contenido di e buki aki. Pronto mucha por fia e buki na biblioteca Playa y San Nicolas.

Koko Lep i Koko Lap tin bon manera

Sra. Denise de Jongh-Rekwest a trece un otro buki di mucha titula ‘Koko Lep i Koko Lap tin bon manera’. Esaki ta pa e muchanan chikito entre 0 pa 4 aña di edad cu ta bin lesa na biblioteca.

Cu e buki aki nan por cuminsa siña poco di etiketa, con pa comporta nan mes nechi. Sra. Denise de Jongh-Rekwest ta experto riba tereno di etiketa y educa mucha etiketa. E publicacion aki a keda ilustra pa Kaylee de Jongh y Giselle Rhuggenaath