Director di DOW cu splicacion tocante kico ta e plan pa edificio di Aduana na L.G. Smith Boulevard

ORANJESTAD (AAN) – Na Departamento di Obranan Publico (DOW), a tuma lugar un conferencia di prensa, Diabierna mainta, den cual su director Ing. Marlon Croes a aclarea algun punto cu ta bin dilanti den algun medio di prensa.

            E biaha aki ta bay specificamente riba e tema di Aduana, segun Ing. Marlon Croes a menciona,  cu na DOW nan ta wak tur e informacionnan cu sali den media y tin di nan cu no ta corecto, indicando cu pesey a yama e conferencia di prensa pa clarifica, y duna informacion corecto manera cu esun di Aduana a sosode.

            Marlon Croes a bisa cu toch nan ta contento cu informacionnan ta sali y DOW por tene su mes skerpi, pa haci nan trabao.

            Croes a splica cu na 2015 e Kantoor di Aduana di L.G. Smith Boulevard y bay den diferente edificio   rond di Aruba, cu intencion cu nan ta bay un edificio nobo. Na 2016, mesora a cuminza cu un prijsvraag pa e Oficina principal di Duana,  na Barcadera.

            DOW a traha un documento cu tabata na benta pa e arkitectonan y artistanan cumpra pa participa den e prijsvraag aki, pa un balor di 50 florin; e cap cu DOW a pone den e diseño cu e lo tin, tabata 7.5 miyon.      Nan a ricibi diesdos diseño, cu a wordo entrega, y tabata tin un hurado cu a consisti di siete persona, entre arkitecto, constructor, financiadornan, Cuerpo di Aduana mes y DOW den dje y nan a evalua e diesdos diseñonan. 

            Di e diesdos diseñonan aki a sali un rapport y esun cu a gana e prijsvraag ta yama “Expanded Limits” di Pimec. 

            Marlon Croes a agrega cu pareu cu esaki DOW a tene un inscripcion habri pa “erfpachtuitgifte” di e Kantoor di Aduana na L.G. Smith Boulevard; a traha un documento cu tur e rekisitonan con esaki ta sosode, y e documento aki ta na benta pa 1500 florin, pasobra ta papia di un proyecto hopi mas grandi y substancial.

            “Nos tabata tin tres candidato fuerte na Aruba cu a cumpra e documento aki, cu intencion di participa na e inscripcion habri aki. E minimum inzet bedraag ta 11.6 miyon cu ta tereno cu edificio inclui. E 11.6 miyon aki tabata un taxatie rapport di 2016. Durante e destaho ey, dia 7 di December 2016 no tabata tin ningun inscripcion. Nos a haya e candidatonan fuerte, cu a cumpra e documento pero no a haci oferta, kiermen pa e prijs ey ningun hende kier a haye”, Ing. Marlon Croes, director di DOW a declara.

            E director di DOW a sigui relata cu e añanan a transcuri y durante 2018-2019 DOW a ricibi dos proposicion: uno di Bohama y e otro ta Wind Creek y a keda pa inicia e trabaonan na December 2020.

            “Nos a update e taxatie rapport cu nos tabata tin di 2016. E taxatie rapport nobo ta indica cu e taxatie waarde cu na 2016 tabata 11.6, na 2020 e tabata 9.9 miyon reparti den 3.1 miyon na edificio, 6.8 miyon na tereno, cu ta ekivalente na 1.692 florin pa meter cuadra”, Ing. Marlon Croes a splica, y a señala cu den medionan di comunicacion nan ta papia di 4 mil, 5 mil florin pa meter cuadra.  

            “Nos tin deseo di yega eynan berdad, pero nos tin cu haci hopi trabao como gobierno y como sector priva pa nos embeyece e area cu por yega na 4 mil of 5 mil florin pa meter cuadra den e area ey”, Marlon Croes a añadi.