Minister di Husticia Arthur Dowers:
ORANJESTAD (AAN) Den e reunion cu Minister di Husticia Arthur Dowers cu Sindicato TOPA, cu a tuma luga recientemente na Korrektie Instituut Aruba (KIA), a haci diferente palabracion y intercambio di opinion. Durante e encuentro, e minister a indica cu lo sigui duna actualisacion riba e diferente situacion y medidanan cu ta tumando luga simultaneamente na KIA.
Minister Dowers a splica cu e situacion na KIA ta compleho y no ta un asunto cu por wordo resolvi cu un solo decision. Segun e, e institucion ta enfrenta diferente tipo di problema, manera falta di personal, problema di maneho y organizacion, infrastructura y tambe desafionan relaciona cu procesonan legal. El a agrega cu e disgusto entre trahadonan ta existi pa hopi aña caba.
Segun e minister, Sindicato TOPA a expresa satisfaccion despues di nan participacion den e reunion, pasobra esaki ta duna nan e oportunidad pa responde miho riba e diferente preguntanan cu nan ta ricibi di nan miembronan. Pa e siguiente reunion cu lo ser teni na KIA, lo invita e sindicato atrobe.
“Nos ta sigui traha duro, no solamente pa KIA sino tambe pa tur otro departamento cu ta resorta bou di Ministerio di Husticia cu a keda desfuncional. Apesar cu tin hende ta gaba cu nan a haci hopi cos, mi no ta mira e resultado di e trabao cu nan mes a bisa nan a haci asina tremendo,” Minister Dowers a declara.
Segun e, na momento cu nan a laga gobierno na 2017, a laga atras un proceso di reorganizacion di e prison. Sinembargo, segun e minister, door di faborece un persona y laga tur otro un banda, esaki a contribui na crea diferente problema den KIA.
El a enfatisa cu, poco poco ta yega na solucionnan pa e situacion na KIA. E proceso lo envolvi tambe diferente entidadnan dentro di e cadena di husticia, incluyendo Openbaar Ministerie, CEA, Reclassering Aruba, e Corte y otro instancianan cu ta traha den e ramo di husticia. Segun e, tur e entidadnan lo mester adapta nan forma di traha.
Entre e sugerencianan cu ta wordo considera tin e posibilidad pa busca personanan di EPI pa brinda apoyo na e trahadonan den prison. Tambe tin sugerencia pa envolvi companianan priva pa asumi cierto servicio den y rond di prison, manera ya ta wordo aplica na algun otro pais.
“E ta un situacion dificil, pero e tin atencion total di gobierno. Nos no a premira cu e situacion ta asina serio y nos no por resolv’e den un tempo hopi cortico,” e minister a conclui.
