Stichting Hunto a inaugura su edificio nobo na Dakota:
ORANJESTAD (AAN): Stichting Hunto a logra un 'milestone' y a transforma su vision den realidad. Diahuebs ultimo a marca e momento oficial di inauguracion di nan edificio, situa na caya Appeldam den Dakota.
Durante un ceremonia special, Parlamentario y Lider di Fraccion di MEP, Hendrik Tevreden, tabatin e honor di ta presente. El a expresa su alegria y satisfaccion, destacando con leu a yega den loke ta e proyecto aki.
Bayendo bek den tempo, Tevreden a recorda cu na 2018, su persona a entrega un mocion cu a wordo aproba pa uni SPD (Sociaal Psychiatrische Dienst) hunto cu FMAA (Fundacion pa Maneho di Adiccion di Aruba).
E tempo ey minister Schwengle a laga atras e idea pa cera SPD y lag’e pasa pa historia. Sinembargo Fraccion di MEP a sostene su peticion pa uni FMAA y SPD, y minister di Salubridad e tempo ey, Sr. Oduber, a duna e mandato pa cuminsa cu e trabounan den stuurgroep pa haci e fusion.
Awe cu un hunta di directiva nobo, nos por mira cu nan a bay mas leu ainda. Bou di e liderazgo di Sr. van Trigt, hunto cu Sr. Werleman, Sra. Montalvo y Sr. Rijsdijk, Stichting Hunto a bira un di e stichtingnan mas mihor organisa financieramente. Nan logronan ta evidente, cu a culmina den un impresionante edificio cu lo brinda servicio di nivel pa nos comunidad. Nos lo duna nos sosten pa Stichting Hunto logra tambe pa ta mas mihor organisa riba cuido pasobra Aruba ta depende riba nan. E vision di e hunta pa cu Stichting Hunto ta grandi, ambicioso pero realisabel, y for di Parlamento sigur nan lo ricibi apoyo pa nan logra metanan cu nan tin proponi.
"Por mira Stichting Hunto, trahando hunto pa yuda nos comunidad riba e tereno di adiccion y salud mental y awor den un edificio tremendo, sofistica y adecua pa su clientenan. Esaki sigur ta un avance pa locual ta salud mental y adiccion. Mi ta kere cu esaki ta un comienso, riba un nivel nobo y nos kier felicita nan pa un logro asina grandi. Pero nos kier encurasha nan tambe pa sigui atende cu e problemanan di adiccion, salud mental y problemanan social entre e hobennan y adultonan di nos pais. Cu e edificio aki nan lo por trata como 400 mucha pa aña y como 1000 adulto pa aña. Esaki ta un cantidad substancial cu lo yuda grandemente den e problema mental cu nos a bini ta experienciando den nos pais. Hopi exito y pabien Stichting Hunto completo", Tevreden a expresa.
"Awor nos comunidad por acudi na Dakota pa por busca ayudo y bira mihor".
E parlamentario tambe a extende su felicitacion na Gobierno, Gabinete Wever-Croes II, y particularmente na Minister di Asuntonan Social y Husticia, Sr. Rocco Tjon, pa nan apoyo continuo y compromiso den e lucha pa mehora e bienestar di nos comunidad.
