Edificio Uncle Louis Store a haya premio como monumento riba Dia di Mama Tera

Dia di Mama Tera 2022:  “Ban inverti den nos planeta”

ORANJESTAD—Directie Natuur en Milieu (DNM) ta trece dilanti, un biaha mas, e historia di dia di Mama Tera (Earth Day), como tambe e tema pa e aña aki, pa crea mas concientizacion rond di e tema. E plataforma earthday.org a organiza eventonan dos aña pasa den forma digital. E aña aki lo no ta uno mucho diferente. E biaha aki lo tin un combinacion di algun sesion online y “vialivestreaming” den cada pais.

DNM tambe lo tin un evento den forma di colaboracion conhuntamente cu Monumentenfonds, unda cu e edificio Uncle Louis Store ta ricibi un premio como monumento, como tambe pa su calidadnan sostenible. E tema “Ban inverti den nos planeta” riba fecha aki 22 di April “Earth Day” ta pa activa comunidad pa haci actividadnan boluntario manera un clean-up of plantamento di mata pa e bienestar di nos medio ambiente y  Mama Tera.

Riba e plataforma Earthday.org por wak e live webinarnan y serienan realiza cu ta enfoca riba empoderamento di hobennan. Tambe den e plataforma aki por wak riba e mapa kico cada pais y nan organizacionnan ta haciendo riba e dia aki. Na Aruba, nos por aprecia cu algun organizacion a registra nan evento di cual DNM ta uno cu ta enfoca riba e tema di: pakico ta importante pa incorpora esfuersonansostenibel ora di renoba edificionan monumental. Riba e dia aki e edicifio den cua DNM ta ubica, actualmente, ta ricibi e premio Pieter van Vollenhoven 2022.

E edifico renoba ta uno cu cualidadnan cu ta sostenibel. Ehempelnan di esaki ta e awa procedente di e airco cu ta bay pa un tanki dedica cu su turno ta uz’e pa flush e toiletnan den e establecimento. Drain di toiletnan si ta bay via sistema di riolering pa RWZI na San Nicolas. E edificio tin solar panelnan instala riba e dak.

E sistema di luz y airco ta programa pa solamente ta activo durante ora di trabou y tin movecion.E porta y bentananan tin un otro tipo di blokeo pa solo pa calor no drenta. DNM conhuntamente cu Plastic Beach Party (PBP) a logra cu PBP a pone panelnan di plastic recicla pa proteha contra solo y tambe yuda e sistema di airco. Asina nos ta contribui tambe na e sistema di bida circular pa e material plastic.

Parti paden na DNM ta colecta tur plastic y ta uza e servicionan di PBP pa entrega esakinan pa wordo recicla. DNM ta contento cu e premio cu e edificio a logra obtene y tambe cu ta riba e dia di Mama Tera 2022 ta ricibi esaki pa asina pone enfoke riba un edificio monumental, cu cualidadnan sostenibel cu ta aporta na nos medio ambiente. Tur edificio tin nan historia y Uncle Louis Store tambe tin di dje, mescos e dia di Mama Tera conoce su origen.