Desastre ta splica pakico DIARIO a pidi investigacion “Bo Aruba” --- *Mata banda di prome piedra tabata di sumo importancia pa Gobierno --- *Drama di hospital ta continua y peligernan mas grandi ta sigui existi
ORANJESTAD(AAN)—Na Mei 2014 e proyecto Hospital a haya su inicio. A pone e prome piedra pa e edificionan nobo cu mester a bini banda di e hospital cu ya tabata existi.
E prome piedra pues a wordo pone banda di un mata cu a haya tur atencion di Prome Ministro Mike Eman, cu a pidi pa no deshaci di e mata. Pero manera e Presidente di SOGA, John Hodgson a mustra e tempo, mester a deshaci di e mata lamentablemente.
Awe no ta futuro di e mata, pero bida di hende ta na futuro den e hospital cu a costa Pueblo un capital y cu a wordo presenta dor di Gobierno Mike Eman como un hospital di cinco strea, pero manera awe ainda ta wordo demostra, no a cumpli cu loke un hospital mester ofrece.
Cu e hospital lo a presenta problema y ainda por presenta problema serio, tabata conoci for di momento cu hacimento di politica a stroba Pueblo mira e realidad di e loke awe Pueblo mester biba cune y cu ta lugar di trabou di e grupo di trahadornan den cuido, cu for di inicio tabata mustra riba realidad di e hospital nobo.
Hospital Horacio Oduber awe ta duna prueba pakico DIARIO a mustra cu e rapport “Bo Aruba” cu a permiti uzo di 1.6 Biyon di Pueblo di Aruba, mester a wordo investiga debi na su preparacion.
Si sigui cronica di tur loke a bini durante for di momento cu a cuminsa uza e hospital, ta mira con desastre y mas desastre a wordo pronostica mientras tambe a wordo adverti pa situacionnan mas dramatico.
Ora bolbe un rato den historia ta topa cu e informacion di Rampencommissie, cu ta encarga cu prevencion di calamidad.
E comision no a haya oido den construccion di e Hospital mescos cu lo tabata e caso tambe cu PAHO, e Organisacion Pan Americano di Salud.
A wordo adverti cu na momentonan cu Aruba mas lo por mester di un hospital den por ehempel un calamidad di tempo, Pueblo di Aruba por keda sin hospital debi a e lugar cu e hospital ta situa y cu por keda bou awa durante yobida pisa.
Ta di spera cu nunca un mal tempo acerca Aruba y provoca yobida cu por crea emergencia serio y afecta e hospital cu for di prome momento a duna tur indicacion cu placa a wordo gasta pa un proyecto, cu mester a sirbi un motibo politico mas cu e ta sirbi bienestar di Pueblo.
Ayera atrobe tur hende tabata na careda na hospital den otro caos cu a presenta su mes.
Mientrastanto habitantenan di Aruba ta reclama e hospital y e material cu mester acomoda pashentnan ora nan ta busca nan salud na e centro di cuido cu a costa comunidad un capital.
Aparentemente e camanan ta un desastre total y hasta pregunta ta wordo haci entorno e compania cu a entrega cama, cu ta parti di e ekipo di hospital pa cual a pone un suma considerabel disponibel den e rapport “Bo Aruba”.
Na caminda pa eleccion 2017 hopi propaganda a wordo haci cu e hospital cu despues di eleccion 2017 a bira un calamidad riba su mes pa Aruba.
DIARIO ta den contacto cu instancianan experto riba tereno medico internacional, cu ta sigui insisti cu pa e suma cu a gasta den e hospital mester a uza un team di expertonan internacional pa guia e proceso.
Kico esaki ta encera lo bira topico di mas informacion riba e centro principal di cuido na Aruba.
