Reflexion. Grupo Hesus Biña Nobo
El a yega di pasa bo? Bo ta haya un idea cu ta unico, por ta un idea pa un cantica of bo a imagina un arte cu niun hende no a traha ainda.
Porta hasta un plan di trabao cu bo ta wak un bon oportunidad pa hacie riba nos isla.
Bo ta emociona y cla pa cuminsa traha riba dje! Bo ta cuminsa bo meta nobo y di un manera of otro e meta su briyo cada vez ta keda bira menos.
Loke bo a pensa, di un manera of otro , ta mustra hopi mas dificil y te hasta bo ta cla pa rindi.
Si abo ta e persona aki, bo mester sa cu por ta bo idea no ta malo, pero por ta, ta e manera cu bo ta trahando riba e meta aki.
Si bo a pone e metanan aki un banda, gara nan di nobo, kita e stof for di riba dje! Awe nos ta bay traha riba cinco manera pa yega na nos metanan.
- Skirbi e meta y visualize tur dia.
E ta mustra hopi simpel, pero e berdad ta cu ora nos skirbi algo y nos pone na unda cu nos por lese, cada biaha e ta bay yuda nos corda riba loke nos ta trahando pe.
- Dal pasonan chikito.
Pa cada proyecto bo mester dal pasonan chikito pa yudabo yega na bo meta final. Poniendo metanan chikito, prome bo yega na esun grandi, ta segura cu bo ta dal pasonan sigur y firme.
- No desanima ora algo sali for di bo control.
Envez di perde speranza cu algo a bay malo, mire como un oportunidad pa cambia e fout y haci e plan mihor cu prome.
- Puntra otronan cu sa pa yudabo.
Puntrando otronan lo mustra bo bon y bo malo den un tema, pa loke bo por cambia y mehora.
Loke ta importante ta pa tin un pensamento habri pa bo por ricibi e informacion cu un otro por duna bo.
- Kibra e mal habitonan y tuma responsabilidad.
Nos tin e tendencia di purba di tira e culpa riba otronan, mientras esun culpabel ta nos mes. Y hopi biaha e ta bin door di e habitonan cu nos ta forma. Si bo kier ta mihor den un area, bo mester practica pa bo ta mihor den e area ey.
- No ansha, pero bo mester tin pas.
Door di nos cultura, awendia nos kier hopi cos instantaneamente. Nos pasa un fast food, nos ta haya nos cuminda lihe. Nos kier entretenimento, nos ta djis habri nos cel y e ta eynan mes.
Pero hopi biaha nos metanan por tarda. Claro cu tur ta varia; algun un par di dia, otro un par di luna y algun hasta añanan.
Y esey por trese anshamento. Den Bijbel 1 Pedro 5:7 ta bisa: “Tira tur preocupacion riba Dje, pasobra E ta cuida boso.”
Nos, como e yiunan di Dios, por confia cu e tin tur cos bon prepara pa nos y nos semper por confia den dje.
Nunca rindi, pasobra ni un otro hende lo bringa pa bo meta cu no ta abo mes!
