Gobernador Boekhoudt:
ORANJESTAD (AAN): Mescos cu tur aña, Gobernador a tene su discurso riba Aña Parlamentario Nobo den Parlamento y den e prome parti di su discurso, Su Excelencia Gobernador Alfonso Boekhoudt a enfoca riba Democracia.
“Awemainta nos ta bini hunto pa duna inicio na e di 38 apertura di un aña parlamentario nobo”.
E 21 miembronan cu ta forma parti di e organo aki, hunto cu Gobierno, ta eherce e poder legislativo. Un poder cu Pueblo a confia na cada un di e miembronan aki presente. Esaki ta algo grandi y alaves delicado, pasobra e ta implica un gran responsabilidad. E responsabilidad pa defende, proteha y salvaguardia e principionan di nos estado di derecho.
Democracia ta algo valioso. Democracia no solamente ta e base riba cual gobernacion y representacion di pueblo ta funda, pero ta e salbabida di convivencia, respet, libertad, igualdad, husticia y participacion inclusivo. Ta crucial pa nos uni, lanta y defende e principionan di igualdad y di dignidad humano, cual ta un tarea di nos tur. Defende y proteha esnan mas vulnerable, como tambe esnan cu no tin voz; esnan cu bida no a duna nan oportunidad pa desaroya nan mes; esnan cu a haci di Aruba nan hogar; esnan cu ta yuda nos Pais progresa, pero toch ta biba margina.
Ta e tarea di nos tur pa percura pa e bienestar di tur e gruponan aki; unda cu nos por comparti e bienestar como resultado di un crecemento balansa y sostenibel den un ambiente di libertad y respet pa cada un ciudadano.
Den e defensa y proteccion di e balornan aki, no tin espacio pa sembramento di odio, intolerancia pa cu otro of falta di respet pa nos prohimo na tur nivel, haciendo uzo hopi biaha di e anonimato di rednan social. Nos ta promenan yama pa duna e bon ehempel. Nos – den e sala aki – ta refleho di nos sociedad.
Gobernador a papia tambe di e situacion financiero di nos isla y a bisa lo siguiente:
“Aruba ta recuperando financieramente y economicamente y poco poco ta superando tambe varios fase critico despues di e golpi duro di e ultimo añanan. Maneho di Gobierno lo enfoca riba esaki durante e aña cu ta inicia awe”.
E panorama economico ta keda uno positivo pa 2024. Esaki ta keda refleha den e presupuesto entrega na Parlamento pa aña 2024 unda cu Gobierno ta premira un resultado financiero mihor cu aña anterior. Mientras cu e gastonan di personal lo keda den cuadro di e normanan palabra, e gastonan di interes ta keda punto di preocupacion, aunke cu e proporcion di e debe nacional den comparacion cu nos economia lo reduci segun e resultado presupuesta.
Nos ta bibando den un epoca cu hopi reto- y desafio, pero tambe cu oportunidadnan. E trayecto cu Hulanda tocante refinanciamento di debe di Covid ta andando. Aruba ta boga pa logra un acuerdo a base di respet mutuo cu lo beneficia tur dos partido. Asina Aruba ta sigui traha pa transforma e retonan den oportunidadnan mutuo y ta sigui inverti den e relacionnan importante dentro di Reino Hulandes.
{gallery}Democracia ta tambe salbabida di convivencia, respet, libertad, igualdad, husticia y participacion inclusivo{/gallery}
