ORANJESTAD (AAN )— Dialuna mainta, fraccion di Partido Movimento Electoral di Pueblo “MEP” a yama su conferencia di prensa semanal, den cual Parlamentario Shailiny Tromp-Lee a hiba palabra.
Tromp Lee, a comenta cu e siman aki ta trece hopi reto pa Parlamento, unda tin diferente ley pa trata, manera esun di COHO, RAft, Presupuesto. Sinembargo, el a menciona cu e no kier elabora den e ocasion aki riba e tres aspectonan aki. El a elabora si, riba e carta cu Parlamento a haya for di SKOA, Diabierna ultimo.
E parlamentario a expresa cu e anuncio cu SKOA a haci, encuando aumento di schoolgeld, ta uno cu mesora ta trece preocupacion.
E ta un realidad cu tin un disputa andando pa loke ta diferente punto di atencion pa loke ta trata SKOA, y e problematico di e werksternan ta data for di 2020. El a señala cu manera Gabinete Wever-Croes a forma, Minister di Enseñanza a institui un comision pa atende cu diferente punto, entre otro e asunto di werkster. El a agrega cu e carta di SKOA ta papia pa su mes, unda ta informa parlamentarionan cu SKOA a tuma e decision di aumenta schoolgeld, pa por acapara gastonan cu a bin ta acumulando, y pa nan por cumpli cu pago di nan debenan.
Parlamentario Tromp-Lee a menciona cu n a mes momento el a tuma contacto cu Director di SKOA, y nan tabata tin un combersacion basta largo Diabierna mainta. Tromp-Lee kier a haya sa con SKOA a yega na e punto aki, y si tin espacio pa sigui elabora y busca solucion.
El a bisa cu e contesta tabata positivo y cu nan preocupacion ta hopi grandi; e suma desde 2020 te cu e decision nobo a wordo tuma pa loke ta trata werksternan a trece nan den un situacion financiero, unda prome tabata papia di 500 mil florin, un miyon, y asina e suma a sigui subi te cu awor ta papia di un suma riba cuater miyon florin.
Esaki tin nan hopi preocupa, y tambe e falta di bin cu un solucion concreto y duradero. E parlamentario a subraya cu despues di a combersa cu e director di SKOA, el a keda positivo pasobra nan ta habri toch, pa sinta na mesa cu gobierno, locual e ta haya hopi importante y esencial.
Parlamentario Tromp-Lee a comenta cu e no a papia mesora cu Minister di Enseñanza, pero si a sinta na mesa cu Mediador di Gobierno y tambe cu SEPPA. Un conseho cu e mandatario a tuma na pecho y a purba di funciona como un brug ta, pa percura Pa e actornan keda na mesa di reunion, pasobra eynan ta yega na solucionnan concreto y enberdad por preveni cu e schoolgeld anuncia, keda concretiza. Traimerdia parlamentario Tromp-Lee a logra papia cu Minister di Enseñanza, y e tin un sensacion positivo c u e solucion ta na caminda.
