Relato Fondo Monetario Internacional den un mundo na careda
- Documento ta describi economia mundial manera lo tabata
- Mundo den recuperacion milagroso prome cu paz a muri
ORANJESTAD (AAN)- E posibilidad cu mundo lo por a conoce un entrada suave despues di serie di problema cu e mester a sobrevivi, ta e punto central di un rapport di e Fondo Monetario Internacional cu lo mester a mira luz den un mundo completamente diferente di loke el a conoce na su entrada.
Dia 10 di October 2023, e relato a wordo publica y e Fondo Monetario Internacional a presenta e situacion mundial, cu por a wordo considera un recuperacion milagroso despues di un serie di problema cu mundo mester a confronta.
Segun e rapport e posibilidad pa mundo tabata tin un entrada suave den futuro economico a crece, pero e pronostico di crecemento lo tabata esun mas abau den ultimo decadanan.
Pa yega na un relato y sigur su publicacion ta tuma hopi tempo y esaki por ta motibo cu mundo a conoce un documento unico e siman aki, ora tur loke mundo a planea pa e futuro mas cercano, a basha abou.
Segun e autoridad internacional riba tereno monetario, mundo a sobrebibi e impacto di guera riba mercadonan di energia y hasta un situacion monetario sin precedencia.
Hende a wordo confronta cu inflacion, caida di balor di placa, halto, E produccion economico a baha pero no a stop.
Pero tabata tin un advertencia di e autor di e rapport den e bloc di Fondo Monetario Internacional pa October 2023, cu a bira e luna cu a hinca mundo den otro shock inespera y cu sigur lo wordo menciona den e proximo edicion di IMF cu ya tabata realidad na momento cu e atake di Hamas riba Israel a deshaci di paz mundial y tur cos a cambia na mundo.
Por papia pues di un rapport historico cu a nace na momento cu actualmente expertonan ta trata na visualisa kico resultadonan lo ta pa mundo. Historico ta tambe e sobrevivencia di mundo te awor, manera ta bini dilanti den e rapport.
E realidad cu a wordo pinta prome cu mester a pone e sucesonan dramatico actual na Medio Oriente tambe riba e lista, tabata mustra cu e crecemento economico mundial lo a baha di 3.5 porciento na 2022 pa 3 porciento na 2023 y te 2.9 porciento na 2024, loke ta menos cu e proyeccionnan pa 2024 manera presenta na Juli 2023.
Esaki ta nifica cu e crecemento economico mundial lo a keda bou e averahe historico di mundo.
Esaki tabata pues e pensamento experto prome cu e crisis nobo na Medio Oriente a cuminsa y a cambia tur pronostico na mundo.
Crecemento economico mundial pues lo tabata lento segun e rapport sumamente interesante cu ta duna un splicacion di loke mundo mester a spera prome cu e desaroyonan actual na Medio Oriente.
E pregunta grandi ta bira kico mundo mester spera na momento cu otro informenan ta indica con grandi gastonan ta pa mundo drenta e epoca nobo den cual cambio di clima ta exigi inversionnan enorme.
Na Hulanda por ehempel debate ta sigui kico mester haci na e momento cu transportacion mundial lo conoce aumento enorme di tarifanan y tambe medidanan special.
Con ta bay reemplasa e combustibel actual di avionnan y con esaki lo afecta sigur e industria di turismo cu ta na discusion den e proyeccionnan pa enfrenta cambio di clima.
Kico lo pasa cu turismo mundial, uno di e pilarnan di economia na mundo, cu ta wordo menasa pa prijsnan halto pa transportacion, ta otro di e topiconan importante y rapportnan cu DIARIO tin den preparacion pa presenta na su lectornan.
