No por mishi cu Ennia Aruba sin aprobacion di CBA
ORANJESTAD (AAN): Banco Central di Aruba a declara Diaranson atardi, cu nan a tuma nota di e boletin di Banco Central di Curaçao y St. Maarten (CBCS) di 7 di October, cu tabata un update riba e structuracion di Ennia.
Den e boletin ey, CBCS a anuncia cu nan lo bandona e relanzamento y cu lo bay traha den un solucion gradual y controla di Ennia Caribe Leven NV (ECL) den e siguiente simannan.
Nan a anuncia tambe cu CBS lo sigui elabora e escenario aki hunto cu gobiernonan di Curaçao y St. Maarten, y cu “naturalmente tambe lo bay tin di considera e mihor forma di trata e partinan saludable di Ennia Groep (...)”. Den e contexto aki, CBCS ta menciona tambe Ennia Caribe Schade (Aruba) N.V. y Ennia Caribe Leven (Aruba) N.V.
Pero pa loke ta trata e entidadnan di Ennia na Aruba, Banco Central di Aruba ta señala cu ta necesario e aprobacion di CBA prome cu nan por tuma cualkier decision legal pa loke ta e entidadnan aki di Aruba.
Banco Central di Aruba tin e tarea di garantiza e stabilidad di e institucionnan bao di su supervision y lo no duda (si ta necesario) pa tuma medidanan pa salbaguardia e interesnan di esnan cu tin polisa cu e entidadnan Arubiano di Ennia y tambe lo actua sin tardanza contra e partidonan cu ta actua sin obtene aprobacion di antemano di Banco Central di Aruba pa loke ta entidadnan di Ennia Aruba.
