Raad van State a acusa Gobierno di Rutte di falta di vision
- Gobierno di Reino no tabata capaz di traha presupuesto
- Toeslagen Affaire ta splica con ta persigui ciudadano inocente
ORANJESTAD (AAN)- Na e momentonan aki Gobierno di Aruba tin e deber sagrado pa defende no solamente su maneho di Aruba den e momentonan mas dificil cu e pais a conoce.
Realidad ta exigi pa splica Hulanda cu Aruba como partner igual di Hulanda den Reino, por splica Hulanda kico e mester haci pa evita cu den Rapport di Raad van State, wordo papia di falta di vision di e Gobierno di Mark Rutte cu tabata motibo pa entrada di cantidad di partido nobo na Hulanda, cu ta exigi cambio.
Un bon gobernacion democratico ta resulta den adelanto di e Pueblo, cu mester mira con e placa di belasting di Pueblo ta resulta den adelanto di bida di ciudadanonan y no den un caha di Gobierno Rutte, cu pa colmo tabata tin mas gasto cu entrada riba su lista di cifranan loke a haci cu na careda e mester a cambio su presupuesto pa esaki wordo aproba pa Tweede Kamer di Hulanda.
Manera DIARIO a splica, e documentonan tambe mester bay Eerste Kamer y a sigui e ruta cu DIARIO a splica na su lectornan den e ambiente politico Hulandes, cu a faya cu e ciudadano.
Kico ta democracia? Con un pais ta cuida democracia, cu adelanto di e Pueblo y cu un maneho gubernamental cu no ta cruel hasta contra su propio hendenan y a pone un parti importante di Pueblo Hulandes yora pasobra Mark Rutte a comete eror.
E relato mas tristo den historia moderno di Reino sin duda a wordo skirbi dor di Gobierno Mark Rutte cu a haci cu Husticia a persigui ciudadanonan Hulandes inocente cu Gobierno di Mark Rutte y su servicio di impuesto a comberti den criminalnan cu kier a abusa di areglonan financiero di Hulanda.
Berguensa a cubri cara di hende inocente cu Gobierno Mark Rutte a declara culpabel pa awe acomodanan mientras den Parlamento investigacion oficial ta tuma lugar.
Statuut ta regla e relacion den Reino entre seis partner igual. Lamentablemente Mark Rutte mes a aplaudi e momento cu Mike Eman a pone base pa destruccion financiero di Aruba.
Awe, den porta di eleccion Hulandes cu lo marca despedida di Mark Rutte y cantidad di politico actual, Aruba cu a duna prueba na Reino kico ta bon gobernacion, no por permiti su mes di wordo someti na un supervision dor di Gobierno di Mark Rutte, cu a persigui hende inocente cu awe e mester recompensa y cu a haci hasta un investigacion Parlamentario necesario.
Awe Gobierno di Evelyn Wever Croes tin e deber sagrado di defende Aruba y e autonomia Hulandes na momento cu e historia tristo a wordo skirbi contra inhusticia contra e Pueblo Hulandes, cu a yora di berguensa acusa di ta criminal cu e no tabata!
Gobierno Wever-Croes por yega na un cooperacion den Reino pa mehora e proceso gubernamental den tur parti di Reino, tambe Hulanda, despues cu Reino mester admiti e realidad cu papel a seya, cu Evelyn Wever-Croes a entrega prueba cu e ta capaz di a percura cu Aruba tin un base economico fuerte na momento cu henter mundo ta tembla den un situacion mundial cu no ta permiti pa gobernantenan Arubano uza tempo valioso pa proteccion di futuro di Aruba, na creacion di un situacion cu ta contra e areglonan di Reino y tur pais den Reino cu ta estado di derecho a base di ley cu ta splica bon cla kico ta bon gobernacion y kico ta gobernacion bergonzoso cu ta persigui hasta hende inocente manera a pasa cu e Toeslagenaffaire na Hulanda!
