Eclipse total di solo lo wordo mira dia 8 di April na Merca

Na Aruba lo mira un rand fini so:

ORANJESTAD (AAN):  Dia 8 di April proximo ta bay tin un eclipse solar total. Pero esaki ta bay wordo mira mas tanto na Merca.  Jeremio Maduro di Space and Nature Aruba Foundation a duna di conoce cu dos di su coleganan lo ta biahando pa Merca y hunto cu Dr. Edward Cheung nan ta bay ta experenciando e eclipse solar aki.

            Maduro a indica cu algun tempo pasa, Aruba a observa un eclipse parcial. Pero esey no ta e caso di loke ta bay pasa awor, cu ta manera esun di 1998, cu tabata un eclipse total di solo.

            E eclipse aki lo dura mas o menos 4 ora y 4 minuut y mey. Lamentablemente, akinan na Aruba lo bay mira un rand masha fini mes cu practicamente no ta bale la pena pa bay purba wak'e. E no lo tin mucho efecto aki na Aruba, a remarca.

            Jeremio Maduro a sigui bisa cu na Aruba solo ta bay wordo tapa solamente 2 porciento. E eclipse ta bay sosode entre 2:45 pm y 3:20 pm. "Si bo tin bril ainda di e ultimo eclipse cu por a wordo observa na Aruba, bo por wak'e na e momento eynan, pero casi bo no ta bay mira mucho cos. Kisas cu telescope si".

             Aki na Aruba, Space and Nature Foundation ta bay purba haci un experimento di 'zoom in' mas tanto riba e luna di modo cu por mira e contorno di e seroenan ariba luna. Tur cos ta bay depende tambe di tempo, a splica.

             Mientrastanto, na Merca, esnan cu ta na Merca ta bay experencia e evento y ta bay wak si por transmitie via e facebook page di Space and Nature Aruba Foundation.

            Maduro a enfatisa riba e importancia di cuida bo wowo. No bay wak solo sin proteccion. Esnan cu a cumpra bril pa e eclipse recien, por uza nan ainda pa wak e eclipse akinan. No ta recomendabel pa wak'e sin bril. Tambe por haci uzo di e bril di welder pa wak e pida chikito di solo e ora.

            Finalmente, el a duna di conoce cu otro aña ta bay tin un eclipse di luna. Esey lo por bay mira na Aruba den e temporada aki, otro aña.