Un evento di halto nivel:
ORANJESTAD (AAN)—Despues di a bishita e companianan PRIVA y Peppers na Den Haag, Minister Geoffrey Wever y su delegacion, a sigui pa e “Aruba Investment Summer”, cu a tuma lugar den oranan di merdia Diahuebs siman pasa.
E dignatario a menciona cu esaki tabata un reunion sumamente agradable y un cooperacion entre VNO, KvK y Aruba Huis.
Minister Wever a subraya cu tabata tin diferente orado cu a duna nan perspectiva y na final di e session tabata tin dos “breakout sessions” unda cu inversionistanan cu tabata mas interesa den e desaroyo di San Nicolas y Oranjestad, a bay den un parti di e salanan na unda a intercambia mas riba posibilidadnan na Oranjestad y San Nicolas, desaroyonan di inversionistanan priva, desaroyonan di parti di gobierno y oportunidadnan.
Tambe tabata tin un otro sesion di trabao mas dirigi na e aspecto di sostenibilidad, industria agricola, transicion di energia, entre otro; y tabata tin representantenan di diferente minister presente, pa trece dilanti e vision di gobierno pa trece e vision di gobierno y intercambia mas tanto cu e grupo interesa den sostenibilidad.
“E evento aki a wordo clausura cu un ‘network event’ unda cu nos a haya oportunidad di intercambia idea cu esnan cu a participa, scucha nan ideanan y nan feed back. Mi mester menciona cu esnan cu a participa tabata un grupo basta diverso, e ambiente tabata hopi bon, cu hopi interes pa Aruba y por a wak cu tabata tin gruponan hopi interesa den e desaroyo di real estate cu kier sa kico ta e oportunidad den centro di Oranjestad cu San Nicolas”, Minister Wever a indica.
El a señala cu tabata tin tambe representantenan di e sector agricola, diplomaticonan tambe presente, inversionistanan y hende cu ta di acuerdo cu e ideanan cu gobierno tin, y algun empresa cu ya caba ta haciendo negoshi na Aruba of cu ta interesa den haci esaki, y empresanan cu a topa caba den pasado y cu a bin pa reconfirma nan compromiso pa reinverti na Aruba y pa scucha kico ta e desaroyonan nobo riba e tereno economico pa Aruba. “Pues, tabata un summit hopi positivo, hopi bon.
E dignatario a gradici tur esnan cu a traha duro pa haci e encuentro aki un realidad, entre otro VNO, Camara di Comercio, Departamento di Asuntonan Economico, personal di Bureau Aruba Huis, y hopi mas cu a contribui pa un evento di halto nivel tuma lugar.
