Expertonan cu sosten total pa Encuesta Parlamentario pa desaroyonan WEB - DIARIO ta investiga posibel acercamento di Eagle LNG dor di otro grupo - Eagle LNG lo a wordo pidi pa spera resultado eleccion 2021 na Aruba
ORANJESTAD(AAN)- Expertonan y informantenan clave di DIARIO, cu a permiti DIARIO prepara Aruba pa desaroyonan cu awor a bira realidad na e pais, ta sigui insisti pa Parlamento di Aruba realisa un Encuesta Parlamentario riba tur asunto cu ta relaciona cu WEB for di momento cu Gobierno Mike Eman a sinta na 2009.
Informantenan clave a mustra DIARIO cu ta casi diez aña pasa, cu e asuntonan di WEB Aruba NV cu mester produci awa y coriente pa Aruba a cuminsa.
Den esaki tabata tin dos punto importante cu den e forma cu nan tabata wordo presenta na Pueblo no a bini dilanti.
E prome misterio cu a keda misterio pa Aruba tabata, e 200 Miyon cu Gobierno Mike Eman lo tabata tin disponibel pa yega na un negoshi hunto cu Valero cu na 2009 ya a demostra cu e ta bandona Aruba como refineria.
Na Hulanda tabata tin presentacionnan y segun informantenan por mira cu den tur placa cu a gasta pa tene sesionnan informativo na Hulanda, biaha entre otro, na 2016 prueba a wordo duna cu Gobierno Mike Eman no a yega na nada concreto pa WEB y gas.
Un documento sumamente relevante pa pa informantenan di DIARIO ta e documento di 2016 den cual Utilities dirigi e tempo pa Hoevertz a uni cu GasUnie y cu WEB pa bisa Mike de Meza cu nan kier yega na un acuerdo pa trece gas den un situacion legal GasUnie di Hulanda lo tabata un “equity partner”.
Na e momento pues no por tabata tin ningun acuerdo entre Gobierno Mike Eman cu for di 2012 sigur a bini den publicidad riba e topico aki, pa entrega di gas na Aruba.
Informantenan di DIARIO ta mustra cu segun e documentonan di 2016, na 2017 e trio di WEB, Gasunie y Utilities Aruba NV cu Hoevertsz na cabez, lo a presenta candidatonan pa entrega gas pa WEB na Aruba.
For di 2012, cu Gobierno Mike Eman sigur tabata gasta placa di Aruba den intentonan pa trece gas, nunca el a yega na un acuerdo pa Aruba haya gas y na 2017 ningun candidato a wordo presenta, te asina leo cu instancianan oficial ta na haltura.
Manera ta conoci, ora Gobierno Wever-Croes a bisa cu e no tin confiansa den Hoevertsz, a wordo trece dilanti dor di gruponan di AVP cu Hoevertsz ta un persona cu por relaciona cu AVP.
DIARIO no por duna evidencia di esaki ya cu voto ta secreto.
Importante ta, cu manera informantenan ta splica, mester tin mas documentacion di loke a wordo discuti cu posibel companianan for di 2012 pa gas pa WEB, cu ta un asunto sumamente serio.
Segun expertonan cu ta informa DIARIO, un Encuesta Parlamentario sigur ta na su lugar. Esaki mas ainda despues cu DIARIO a ricibi informacion cu ainda e ta investiga, cu si ta berdad cu un grupo di Aruba, cu a pensa cu e resultado di eleccion 2021 lo tabata diferente, a acerce Eagle LNG y anuncia cu por spera resultadonan diferente na eleccion 2021 y cu esaki por nifica cu Eagle lo mester a sigui negocia cu e Gobierno cu lo no ta Gobierno Wever-Croes, y cu lo tabata tin un oferta nobo pa Eagle LNG.
DIARIO na e momento aki ta den contacto cu tur su informantenan pafor di Aruba pa investiga si di berdad Eagle LNG un empresa certifica na Merca cu no ta permiti pa actua na forma inelegante, a wordo acerca pa otro grupo.
Teniendo cuenta cu tur desaroyo, expertonan di DIARIO ta insisti cu mester bini un Encuesta Parlamentario cu ta atende cu tur aspecto di WEB cu ta compania vital di Aruba.
