ORANJESTAD(AAN): Durante e reunion cu Formador recientemente, Ordo di Abogado a papia tocante e circunstancianan menos agradable na wardanan di polis.
“E situacion na wardanan di polis no ta mucho bon y te hasta por yama esaki un situacion di decadencia”.
Diferente biaha ta dificil pa e abogadonan yega na nan clientenan, mientras cu e circunstancianan den e celnan ta hopi decadente.
Nos a pidi atencion pa esaki, pa por haci algo riba e situacion inhumano cu ta existi den e celnan, segun Dirk Ormel.
El a indica cu el a papia cu Formador tambe riba un aumento di e compensacion cu abogadonan ta ricibi pa casonan civil.
Segun Ormel, actualmente e abogadonan ta ricibi un compensacion limita den casonan civil pro deo pa esnan cu tin un entrada abao.
“E compensacion cu ta wordo duna awor ta hopi abao, door di cual e abogadonan no por haci nan trabao debidamente”.
Esaki ta pone cu hopi abogado e ora ey no ta mucho interesa den e tipo di casonan aki, segun Ormel.
El a pidi Formador pa duna esaki atencion tambe.
