ORANJESTAD (AAN): Siman a habri cu e informe suministra pa Fundacion Lotto pa Deporte (‘FLPD’), Canadian Bank Note Company, Limited (‘CBN’), y Canadian Bank Note (Aruba) N.V. (‘CBNA’),
unda nan a anuncia di a cera un acuerdo tipo ‘Technology and Management Support Agreement’ nobo cu ta posiciona Lotto pa cumpli cu e futuro rekisitonan pa loteria cu e Landsverordening toezicht kansspelen (‘Ltk’) ta bay trece cun’e.
Sigurando Lotto su cumplimento cu e Ltk ta clave pa e continuacion di su exito y su sirbimento di e bon causa y e proposito social di FLPD. E acuerdo nobo entre FLPD, CBN y CBNA ta percura pa un base solido pa e proximo pasonan necesario.
CBNA ta operando Lotto cu hopi exito desde 2012 y a engrandece e loteria significantemente durante e añanan aki.
Partidonan a hiba combersacionnan y negociashonnan durante e ultimo aña, cu a resulta den un areglo y acuerdo nobo cu lo mira responsabilidad operacional pasa back pa FLPD mientras e operacion ta sigui beneficia di e aporte tecnico y gerencial di CBNA y CBN por medio di un contract di servicio. E terminonan di e acuerdo nobo lo reduci gasto y maximalisa e contribucion na deporte mientras cu e confiabilidad y balor di entretenimento di Lotto ta worde preserva.
E acuerdo nobo lo keda implementa despues cu algun condicion contractual worde cumpli cun’e. Partidonan ta premira cu e proceso aki lo keda completa dentro di algun luna.
Den e areglo nobo, tin empleado local di CBNA cu lo keda traspasa pa FLPD. E derechonan cu e empleadonan aki a acumula durante nan añanan di servicio cu CBNA lo keda reconoci pa FLPD.
CBN y su empresanan afilia ta proveedornan di confianza di FLPD y Pais Aruba desde 1999. Partidonan ta motiva pa evoluciona nan relacion na beneficio di e publico Arubiano, y su comunidad deportivo en particular, mientras cu nan lo traha riba e pasonan necesario pa implementa e acuerdo nobo.
