E viaducto na Eagle

Den añanan 50 Gobierno di Aruba e tempo ey a cuminsa traha caminda asfalta banda di lama na Eagle direccion Malmok.

A traha esaki den diferente fase. Esaki loke nos tabata yama Boulevard e tempo ey. Ora cu e fase aki caba gobierno a sigui cu e plan di caminda asfalta di Oranjestad pa Eagle.

E caminda asfalta mester a pasa den e tereno di refineria Eagle, Arend Petroleum Maatschappij.

Apesar cu ya caba e refineria no tabata den operacion mas di refina petroleo pero si e keda opera como un sitio di almacena petroleo.

Den e tereno di e refineria tabata tin tubonan cu ta core bai na e waf di e refineria.

Pa no stroba e operacion di refineria gobierno a construi un viaduct pa conecta e Boulevard entre Eagle/ Malmok cu Eagle pa Oranjestad. E construccion di e viaduct a sosede na aña 1956.

Na 1967 a bolbe haci un cambio na e situacion di trafico y a hunga un rol importante den e coneccion pa Boulevard.

Na 1984 cu e construccion di Alhambra Casino, expansion di Divi Hotels, plan pa traha mas hotel den cercania a opta pa basha e viaducto abao.A traha un crusada cu luz di trafico cu atraves di añanan a bira un crusada di dos via.

Pa facilita fluho di trafico Gobierno a construi un rotonde na e sitio. Na April 2021 Gobierno a honra Alex Nieuwmeijer como nomber pa e rotonde. 

Compila Roberto Croes