ORANJESTAD (AAN): Manera DIARIO a bin ta mustrando, e tarifa di AWA y CORIENTE na Aruba a keda mescos cu Januari 2020.
E no a subi ni baha, danki na un esfuerzo di Gobierno hunto cu Utilities Aruba NV.
Esey nifica cu keto bay na Aruba, e prijs promedio di coriente pa vivienda a keda na 240,09 Florin. E prijs promedio di awa pa vivienda a keda na 137.05 Florin.
Si acaso na bo cas diripiente bo a haya cobranza mas halto, esey no tin di haber cu e tarifa. Mas bien e consumo na bo cas. Kizas bo ta lagando airconan mas cendi, of airconan ta birando bieu y no ta eficiente mas, of bo a laba hopi mas paña cierto luna.
Loke si ta cambiando den sector di energia, ta prijs di gasolin y diesel cu ta worde determina primordialmente door di e prijs internacional di petroleo.
Segun Oficina Central di Estadistica, na Augustus 2021 e prijs promedio pa bari di petroleo (US$ 67.62) a conoce un subida di US$ 4.99 (6.9%) compara cu Juli 2021 (US$ 72.61).
Prijs di gasolin a registra un subida di 5 cent (2.2%) na Augustus 2021 y a causa un efecto di 0.10 ppt riba e Indice di Prijs di Consumo (CPI. Prijs di diesel a registra un subida di Afl. 0.60 cent (0.3%) na Augustus 2021 y a causa un efecto insignificante riba e CPI.
Augustus 2021, utilidad, gasolin y diesel como grupo, tabata tin un subida di prijs di 0.6% compara cu Juli 2021 y hunto tabata tin un influencia di 0.11 ppt riba e CPI, mientras cu e restante 404 bienes y servicio hunto, a conoce un subida di prijs di 0.2% y tabata tin efecto un efecto di 0.21 ppt riba e CPI.
