ORANJESTAD (AAN): E trio musical crioyo conoci como ‘297 Strings’, kendenan ta usando instrumentonan manera cuarta,
baho y e mandolin tocando solamente instrumental a lansa un produccion pa Pasco titula "Noche Buena".
E produccion aki ta consisti di 10 cancion clasico popular y cu un zonido unico y suave cu ta sirbi especialmente pa e temporada na momentonan di un cena di Pasco of cualkier momento relahante, cu ta e motibo di e nomber "Noche Buena".
E trio aki ya pa algun tempo ta existi y ta presenta un musica pa entretene den cualkier restaurant of lugarnan caminda ta desea pa un musica de fondo y ta toka diferente genero y clasiconan local y tambe internacional.
Sigur cu falta di hopi gruponan pa e fin di aña aki, sigur e trio aki a lansa un produccion cu ta e bon momento pa alegra e fin di aña aki cu cancionnan cu nos tur conoce.
E trio ta consisti di Jeremy Dijkhoff riba cuarta, Ivan Croes riba baho y Rubin Ponson cu e mandolin.
E produccion ta obtenibel cerca cada un integrante of tambe por yama 730-1214 y pidi pa esun di bo. Un pabien na e trio aki cu e produccion y DIARIO ta desea nan hopi exito.
