Rhomyko Winklaar, director Tienda di Educacion:
ORANJESTAD (AAN) – E tatanan cu tabata (of ta) deteni den KIA, cu a pasa den e proyecto piloto organiza pa Stichting Tienda di Educacion, hunto cu Fundacion pa Nos Muchanan, y otronan, ta haya un certificado, cu cual nan por mustra nan interes pa sigui studia, cu nan tin hamber pa haya informacion, y semper cu nan mester nan ta bon bini na Tienda di Educacion, pasobra nan sa unda e ta y nan ta conoce esnan cu ta guia e proyecto, personalmente.
Rhomyko Winklaar, siguiendo cu e entrevista cu DIARIO, a agrega cu nan a duna e personanan concerni un begeleiding cortico y nan tabata tin preguntanan individual tambe, naturalmente. Tin organizacionnan cu ta bay tuma contacto cu nan ora cu ta asina leu, pasobra nan sa e ora ey ken nan tin cu yama y cu ken nan tin cu papia. Nan ta wordo duna tur informacion pasobra asina nan a start e trayecto, unda nan a duna nan informacion amplio tocante e organizacionnan cu ta trahando na nan bienestar.
Den e caso aki, ta keda na e personanan aki pa acerca e organizacionnan cu ta haci e trabao aki di forma boluntario. Nan ta liber pa acerca e instancianan aki.
Y e organizacionnan por bay cerca nan na KIA tambe pa nan por tin combersacion of duna nan e sosten y guia cu nan mester na e momento ey.
Un aspecto importante ta cu e proyecto no ta solamente pa tatanan cu ta deteni pero pa mamanan tambe. Tienda di Educacion y e instancianan banda di dje, ta bay sigui cu e proyecto pa tin di un banda e tatanan y di otro banda e mamanan, den diferente periodo, pasobra mester tene cuenta cu nan ta duna nan experticia, y nan tin expertonan cu ta bin di afo, y mester tene cuenta cu nan schedule tambe. E intencion ta, señor Winklaar a subraya, pa esaki bira algo mas structural di manera cu ora aña bolter nan tine caba den planificacion, pa asina por atende tanto e tatanan como e mamanan den e trayecto aki.
