Roderick Croes a indica:
ORANJESTAD (AAN): Segun director di Aduana, Roderick Croes, nan tin un tempo caba cu a implementa un maneho unda cu si por wak e productonan cu ta wordo importa tin un 'ander karakter' e ora ey ta exigi pa haci un declaracion, busca e registracion na Camara di Comercio y cumpli cu cierto rekisitonan pa por haya e producto.
"No ta zomaar por pasa cu nan pasobra esey ta crea un situacion iregular cu e hendenan cu ta trece nan productonan na Aruba", a indica.
Croes a agrega cu aworaki na momento cu ta trece un producto cu tin un 'ander karakter', Aduana tin exigencianan y tin cu bay haci un declaracion p'e. Asina ta evita cu hendenan ta haci negoshi riba por ehempel 'vraag en aanbod', via internet of bende den auto. Naturalmente no ta bay caba cu e problematica aki, pero ta purbando di limita esey hopi, a remarca.
E director di Aduana tambe a duna di conoce cu na momento cu bo ta trece algun producto y bo no ta trece recibo Aduana por wak kico e ta y ta bay busca informacion riba e producto pa asina por yega na un calculacion y pa e persona bay di acuerdo cu ne y coopera cu e invoerrechten.
Si acaso, e persona no ta di acuerdo y ta bisa cu e prijs ta mas abao, e ora mester bay warda pa bin cu tur e informacion di e producto pa asina por cobra e invoerrechten ainda, a indica.
Tur esnan cu ta biaha y ta yega Aruba cu algun producto mester presenta e factura pasobra articulo 2 den ley ta bisa cu tur producto cu drenta Aruba mester paga invoerrechten. E productonan cu nan balor ta surpasa 400 florin mester paga pa nan, a remarca.
