E trayecto di Formacion Social pa hende  muher ta cuminza na Augustus

ORANJESTAD (AAN): Durante un conferencia di prensa Diahuebs, minister di Asuntonan Social Glenbert Croes a papia riba e programa di Formacion Social (SVT) pa hende muher.

E mandatario a cuminza na bisa cu 2021 ta un aña historico pa Formacion Social, mirando cu e ta cumpli 10 aña di existencia.

“Ta bay ta un decada di inversion social den formacion di nos hobennan, dunando nan mes un oportunidad pa un mihor futuro”.

Nos ta inmensamente agradecido pa e liderazgo di Jessica Ras for di inicio, pa e cooperacion cu nos tin cu Marina Hulandes, e cooperacion cu nos tin cu Arumil y obviamente e sosten di Gobierno di Aruba, segun Croes.

E mandatario a indica cu e ta orguyoso di por ta e minister encarga cu Formacion Social.

El a indica cu un di e proyectonan cu e Gobierno aki a propone pa logra durante e 4 añanan den Gobierno tabata y ta introduccion di e trayecto di Formacion Social pa hendenan muher hoben.

“Pesey aña 2021 definitivamente ta un aña historico, pasobra nos ta akinan hunto cu e staff di SVT, Arumil y Marina Hulandes pa haci un yamada na nos comunidad, na mayornan y principalmente na e hendenan muher hoben cu kier participa den e trayecto di Formacion Social cu ta inicia na Augustus di 2021, segun e mandatario.

Segun Croes e trayecto ta di 8 luna y 4 luna unda cu bo ta haya un training fuerte na estilo di militar cu bon guia, etica, compromiso y profesionalismo.

Banda di esaki tin tambe un trayecto di core stage, unda cu si bo no kier continua un carera militar, bo por wordo yuda pa haya un otro tipo di trabao.

E minister a bisa cu e ta orguyoso di por bisa cu den Reino Hulandes Aruba ta e prome cu ta ofrece e trayecto di Formacion Social pa hende muher.