ORANJESTAD (AAN): Cosecha tin pa e luna di mei diferente actividad creativo plania incluyendo workshopnan creativo cu ta tuma lugar den e Centro Creativo na San Nicolas y tambe lo bin cu pakete di DIY (Do-It-Yourself).
Den mei, Cosecha ta introduci e paketenan di DIY di AruFlamingo. AruFlamingo ta conoci pa su piesanan di arte traha cu PVC. E linea di parha cu nan ta traha y tambe ta bende via e tiendanan di Cosecha ta inclui entre otro flamingo, barica geel, patrishi y mas parhanan local. Mirando cu AruFlamingo su mision ta pa duna aporte na proteccion di naturalesa y na educacion di esaki, nan a lansa un pakete di DIY unda por traha un cas di paharito cu e material di PVC y palo. Y riba e cas por pinta un diseño propio pa asina embeyece esaki.
Edad pa por participa ta 10 aña bay ariba, pero supervision di adulto ta necesario ora usa clabo y scruf pa traha e cas.
E siguiente workshop di mosaic di e artista local Merveline Geerman ta esun di pelican. Luna pasa e workshopnan popular di mosaic a cuminsa atrobe y publico a traha e gonzalito. Asina participantenan por traha riba nan linea di animalnan local. Edad pa por participa ta 15 aña bay ariba y e workshop ta tuma lugar na Cosecha San Nicolas. Tambe e piesa di pelican ta disponibel como pakete di DIY.
Diasabra 29 di mei e artista local Ana Luidens tin un workshop nobo na San Nicolas. E biaha aki Ana ta introduci su diseño di tas cu por colga na faha, na ingles ta jame un “Belt bag”. Durante e workshop aki, tur hende por pinta nan propio diseño bou di guia di Ana. Cu un “Belt bag” unico, Ana y Cosecha kier inspira publico pa desaroya nan mesun estilo den moda.
