Aruba Airport Authority reconoci cu premio renombra di “Airline Marketing”

ORANJESTAD (AAN): : Cu hopi orguyo Aruba Airport Authority N.V. (AAA) ta anuncia cu e ta e ganado di e

Routes Americas 2025 Award den e categoria di “Under 4 Million Passenger Category”, reenforsando e compromiso di AAA pa desaroyo di servicio aereo, asociacionnan cu e companianan di aviacion y expansion di conexion. 

Reconociendo excelencia den “Airline Marketing”

            E Routes Americas 2025 Awards ta celebra e logronan sobresaliente den mercadeo di aeropuerto y destinacion, honrando e aeropuertonan, destinacionnan y aerolineanan cu a demostra exito excepcional den desaroyo di ruta y crecemento di red. E premio aki ta particularmente significante ya cu e ganadonan ta eligi door di e companianan di aviacion mes, haciendo esaki un di e elogionan di mas prestigioso den e industria di aviacion.
            E aña aki, un total di 15 aeropuerto, cinco destinacion y cinco aerolinea tabata selecciona como finalista den varios categoria. A presenta un total di seis premio, incluyendo tres pa excelencia den mercadeo di desaroyo di ruta di aeropuerto, categorisa pa volumen di pasahero:

Under 4 Million Passengers

4-20 Million Passengers

Over 20 Million Passengers 

Husga pa e expertonan den e industria

            E logro di Aeropuerto di Aruba a keda determina pa un panel distingui di profesionalnan di aerolinea incluyendo:

American Airlines – Jason Reisinger, Managing Director, Global Network

Avianca – Julian Andres Gelvez Hinestroza, Director, Network Planning

Sun Country Airlines – Joe Beckendorf, Senior Director, Network Planning and Charters

Avelo – Michael Corcoran, Director, Network Planning

Bahamasair – Leroy Ferguson, Scheduling Manager

WestJet – Rick Jones, Interim Director, Route Planning

Volaris – Eric Friedman, Director, Network Planning and Strategy

Un trayecto proba pa excelencia

            Aeropuerto di Aruba tabatin e honor di competi den e Under 4 Million Passenger Category hunto cu Curaçao International Airport, Halifax International Airport (Canada), Québec City Jean-Lesage International Airport (Canada) y Syracuse Hancock International Airport (U.S.). Esaki ta marca e di seis victoria di Aeropuerto di Aruba den e categoria aki, despues di a sigura e premio anteriormente na aña 2007, 2010, 2013, 2016 y 2020. E reconocemento prestigioso aki ta resalta e strategianan di mercadeo innovativo di Aeropuerto di Aruba, campañanan local impactante, partnership fuerte cu e aerolineanan y compromiso di expansion. 

Un era nobo den desaroyo di negoshi

            Alinea cu e strategia di crecemento, Aeropuerto di Aruba a restructura e departamento di Air Service Development den e departamento di Aviation Business Development. E transformacion aki ta mehora e recursonan y e capacidadnan, cu un enfoke fuerte riba e maneho di relacion cu cliente y campañanan di mercadeo local innovativo.

            Un gradicimento special ta bay pa Mary Joan Wardlaw, Customer Relationship Officer, su contribucion a resulta esencial pa sostene e partnernan di aviacion di Aeropuerto di Aruba na nivel local.

“Cu e exito den aña 2024 y e crecemento proyecta pa aña 2025, nos ta sigur cu esaki ta marca un era nobo den desaroyo di negoshi. Nos ta keda comprometi pa fomenta partnership di aerolinea, impulsa innovacion y sigura crecemento sostenibel”, asina Jo-Anne Arends, Aviation Business Development Executive na Aeropuerto di Aruba, a expresa.

            Barbara Brown, Chief Revenue Development & Communications Officer, a agrega: “Mi ta sumamente orguyoso di nos team na Aeropuerto di Aruba. E reconocemento aki ta refleha e trabou duro, dedicacion y vision strategico cu ta impulsa nos exito. E no ta solamente destaca nos logronan pero tambe ta enfatisa nos compromiso a largo plaso pa excelencia operacional, experencia di cliente y crecemento sostenibel”. 

Aeropuerto di Aruba: Un lider regional den conexion aereo

            Como bo porta pa felicidad, Aeropuerto di Aruba ta sigui conoce un record den trafico di pasahero. Na aña 2024, aeropuerto a procesa mas cu 3 miyon pasahero, loke ta representa un aumento di 14% den pasaheronan cu ta genera entrada compara cu e aña anterior. Cu un red altamente conecta di 25 aerolinea brindando servicio non stop na mas cu 45 destinacion den 31 ciudad, Aeropuerto di Aruba ta keda e aeropuerto di destinacion premier den Caribe.

            Adicionalmente, e aeropuerto a registra un aumento di 15% den capacidad di asiento, añadiendo 263.000 asiento aña tras aña, fortaleciendo ainda mas e conexion di Aruba y cumpliendo cu e demanda creciente. Na aña 2024, Aeropuerto di Aruba orguyosamente a yama bonbini na dos aerolinea nobo, LATAM Airlines y GOL, a introduci tres ruta nobo y a mira un aumento di 16% den e vuelonan cu e partnernan clave di aerolinea entre otro JetBlue (B6), Delta (DL), American Airlines (AA), Avianca (AV) y Copa Airlines (CM). E expansionnan aki a mehora e conexionnan di punto pa punto ainda mas y a mehora e alcance di distancia largo.