Magaly Brito Secretario General SEPPA:
ORANJESTAD (AAN): E tema di pensioen na Aruba ta uno hopi serio, y mirando e cifranan di cu Sindicato SEPPA a ricibi di SVb, por wak esaki tambe, segun palabranan di Magaly Brito, Secretario General di SEPPA, den un entrevista cu Matutino DIARIO.
“Di otro banda si nos wak e tema di pensioen di ambtenaarnan, esaki tin hopi di haber cu salarionan abao, con bo a acumula bo derechonan pa ora bo baha cu pensioen, y cuanto e ora ey bo ta bay cobra pa luna”, Magaly Brito a señala.
Brito a splica tambe cu tin diferente factor den un areglo di pensioen. “Na APFA, por ehemplo, ora ta baha cu pensioen nan ta puntra bo si bo kier un pensioen halto of un pensioen abao, kiermen e tin di haber cu bo propio experiencia. Tin pensionado ta bisa nos tambe cu e opcion ey pa scoge entre halto of abao ni tey, pasobra e ta abao caba.
E tin di haber tambe cu e costo di bida cu ta hopi halto aki na Aruba, prijsnan di servicio y productonan ta extremadamente halto, como tambe vivienda, loke ta haci sumamente dificil pa hende por biba cu e entrada cu tin”, Magaly Brito a señala.
El a trece dilanti tambe, cu di parti di APFA tabata tin un presentacion reciente, cual lo wordo duna na tur e miembronan di SEPPA, esnan pensionado, unda nan ta indica cu den e ultimo dos pa tres añanan e pensionadonan y esnan activo a haya un cierto porcentahe di “indexeringzacion”.
“Hopi e no ta: 1%-2% pero e ta bay cu el a trata di ahusta pensioennan, teniendo cuenta cu bo gastonan, y e fondo cu Fondo di Pensioen tabata tin, y kico ta e posibilidad pa duna. Nos ta spera cu e fondo di pensioen ta sigui desaroya mas positivo, miho ainda, pa den futuro nan por yuda e pensionado hopi mas.
“E tema di pensioen, nos pensionadonan y nan situacion vs e cifranan di SVb y kico nos kier den futuro a wordo plantea na gobierno. Nos ta spera cu gobierno mira esaki y su importancia y pon’e como punto di agenda riba un discusion na nivel di Dialogo Nacional”, Magaly Brito a remarca.
