Cathleen Gomez-Hernandez:
ORANJESTAD (AAN): HOH Academy ta un departamento di Hospital cu principalmente ta encarga pa educa y train trahadonan di Hospital. Stagecoördinator di Hospital, Cathleen Gomez-Hernandez, a indica cu na momento necesario, e academia ta saca vacatura pa opleiding specifico cu e departamento ta facilita pa esnan cu a wordo tuma pa un funcion pa ta den un opleiding. El a remarca cu esnan cu no ta traha na Hospital, cu a wordo acepta pa un funcion den Hospital, tambe por aplica pa e opleidingnan.
Señora Gomez-Hernandez a indica cu diasabra 18 di april, tin un Open Dag pa duna oportunidad pa hobennan cu ainda no sa kico nan kier sigui studia, pa acerca diferente profesional den area medico y no medico pa haya un bista mas profundo den loke e trabaonan na Hospital ta encera. Lo haya informacion di e trayecto cu mester sigui pa sigui e educacion corecto y realisa e meta cu nan kier yega. Entre otro tambe nan lo wordo informa ki scol y cua pakket nan mester tuma pa sigui un opleiding na Aruba mes.
E Open Dag ta tuma luga diasabra awo na HOH Academy di 9 or pa 1 or, na unda cu lo tin diferente booth di informacion disponibel. Nan lo haya informacion riba diferente disciplina cu informacion y demostracion LIVE di varios departamento.
Tambe lo bay tin hende cu ta encarga pa hiba gruponan di studiante na diferente departamento den Hospital, entre otro Radiologia, Sala di operacion, Dialisis, Functie afdeling y Rehabilitacion, pa asina nan haya miho idea y splicacion di kico ta e cuido medico y siña di e trabaonan y con esakinan ta wordo haci. Esaki ta un oportunidad pa studiantenan siña conoce mas di e trabaonan den hospital y di cuido medico na Aruba.
