Shailiny Tromp-Lee di fraccion di MEP:
ORANJESTAD (AAN) – Parlamentario Shailiny Tromp-Lee, di fraccion di MEP, for di Sint Maarten el a manda informacion relaciona cu e reunion tripartite cu a tuma lugar Diamars, en preparacion di e reunionnan di IPKO cu lo inicia awe, Diaranzon 4 di Mei.
T’asina cu Diamars Parlamentarionan di Aruba a reuni cu esnan di Corsow y Sint Maarten, den un reunion tripartite, unda diferente punto di agenda a wordo trata, tocante asuntonan di importancia y similaridad cu nan tin manera Geschillenregeling, cooperacion den Reino, sosten financiero y COHO, entre otro. Tromp-Lee a menciona cu esaki ta un reunion unda nan a concentra hopi riba e leynan di consensus cu tin riba mesa actualmente. Esaki tabata un bon preparacion pa e reunionnan di IPKO cu ta bay inicia awe.
E parlamentario a sigui splica cu awe e reunionnan interparlamentario ta cuminza entre Hulanda, Sint Maarten, Aruba y Curacao, y mescos cu tabata e caso pa e tripartite, e tema mas importante durante e reunionnan aki ta COHO, cu ta un di e leynan di consensus cu tin riba mesa. El a agrega cu sigur di Aruba, lo trata tambe di biaha e ley di RAft. Esaki ta e ley di consensus di supervision financiero cu tambe Aruba tin riba mesa. Manera ta conoci, COHO ta e ley cu ta conta pa e tres Islanan y RAft ta conta pa Aruba so, ya cu Curacao y Sint Maarten tin e ley aki, ya for di 10-10-10.
Tromp-Lee a indica cu ambos ley forma parti di e condicion stipula pa Hulanda, pa duna Aruba e sosten di likidez cu tanto e tabata tin mester na momento cu e pandemia a surgi na nos Isla.
E parlamentario a reitera cu recientemente den Parlamento na Aruba a atende cu ambos ley, pa fiha un postura y wak kico tur e fraccionnan den Parlamento ta pensa, riba e dos leynan aki.
El a remarca cu for di e reunion aki Parlamento por a conclui cu mayoria di e parlamentarionan na Aruba ta contra e ley di consensus, manera nan ta stipula na e momentonan aki, riba mesa. “Principalmente, pasobra e ta mina nos autoridad como organo y ademas, e autonomia di nos pais”, Shailiny Tromp-Lee a señala.
El a remarca cu e reunionnan den e dianan siguiente, lo ta un bon momento pa hiba discusionnan al respecto y purba hiba un relacion mas beneficioso pa Aruba.
“Mi ta spera cu, en realidad, den e reunionnan tripartite nos por haya puntonan di negociacionnan similar, unda conhunto nos tres como Isla por bay para hunto pa nan, pero na mes momento mi ta spera cu di parti di coleganan di Hulanda, enberdad nan tin e postura di lo kier scucha y tin e apertura pa nos como islanan por trece nos critica, nos sugerencianan y sigur nos proposicionnan pa cambio”, Tromp-Lee a subraya.
El a expresa cu e ta spera cu e delegacion di Aruba por bin cas bek cu noticianan alentador. El a reitera cu Aruba ta bay para pa loke ta e autoridad cu nan mester tin como organo, y na mes momento pa e autonomia di Aruba. Cu Fe den Dios e ta spera cu nan lo por habri e porta bek pa negociacion y e ora ey por concretiza e cambionan anhela pa bienestar di Aruba y su pueblo.
