ORANJESTAD (AAN): Manera DIARIO a bin ta raporta e siman aki, un extension cu ta bin for di panort,
di un area di presion halto mas pisa, ta pone cu Aruba y demas islanan ABC ta wordo azota cu biento hopi fuerte desde siman pasa.
Matanan tur caminda ta zwaai sin misericordia, y habitantenan ta sinti con nan dak ta produci sonidonan cu nunca antes bo ta tende.
E biento aki cu ta yega tin biaha na Aruba hasta na 64 km/h, a pone cu lama tambe ta bruto. Banda pabao di Aruba, olanan ta leve. Banda zuid e olanan ta trankil te modera. Pero e banda pariba te noordwest di costa, lama ta modera te bastante bruto. Olanan ta entre 4 pa 7 pia, y localmente ta yega 8 pia.
Pesey mes Servicio Meteorologico di Aruba a emiti un aviso pa Boto Chikito na e parti Pariba te Noordwest di Aruba, y esey ta keda na vigor te proximo aviso. Ta sugeri ocupantenan di boto chikito pa eherce cautela ora nan ta riba lama grandi.
Mientras tanto riba Dialuna, tanto e organizacion CITRO Curaçao, como tambe Guardacosta di Caribe Hulandes a haya nan ta subi lama pa bay duna asistencia na botonan cu normalmente ta nabega for di Bonaire pa Curaçao. E botonan aki a haya problema cu motor, y no por a nabega mas.
E botonan di rescate di CITRO (organizacion civil di rescate), esta ‘Sea Rescue’ y e boto ‘Dick Braakman’ a logra di bay y lastra dos boto rumbo Curaçao.
Un patruya di Guardacosta di Caribe Hulandes tambe a bay lastra un otro boto mas cu tabata nabegando di Bonaire pa Curaçao, y a haya problema den cercania di Klein Curaçao.
Guardacosta di Caribe Hulandes ta conseha tur doño di boto pa nan service y mantene nan boto regularmente. Percura pa bo tin suficiente material di seguridad y rescate abordo, manera jacket salbabida, flashlight, First Aid Kit, suficiente awa, aparato pa paga candela, VHF Marine-Radio, of un celular cu suficiente bateria charged. Evita di haya problema na caminda y haya un situacion peligroso riba lama cu bo boto.
