E ta orguyoso y contento di forma parti awo di e team di Centro Kibrahacha

Directora nobo di Centro Kibrahacha, Janely Nicolaas:

ORANJESTAD (AAN) Centro Kibrahacha tin su directora nobo cu ta señora Janely Nicolaas, ken den entrevista cu Matutino DIARIO a expresa cu el a yega na un momento hopi special, cu ta e di 40 aña di celebracion di Club Kibrahacha, y e ta sinti hopi orguyoso di forma parti di e team aki, aworaki.

   El a splica cu e tin dos siman cu e mester a wordo poni al dia door di e director anterior, y awo e ta pasando tur cos over, pa djey e por sigui cu Club Kibrahacha. Nan tin su retonan na unda un di e desafionan ta transporte pa nan miembronan, ya cu nan ta un tiki pega cu esey, y door di esey tambe ta stroba tuma miembronan nobo di otro barionan, ya cu nan no tin mas stul den nan bus pa trece nan na Club Kibrahacha.

   E ta kere cu den e traspaso di e funcion aki, e lo tin un miho bista riba kico e por haci mas pa Club Kibrahacha. Un aspecto cu nan ta pendiente di dje ta cu e cantidad di pensionadonan ta creciendo y e ta kere cu esey por hunga un bon rol den expansion, pero esey ta tuma su tempo y nan mester boluntario y e persona corecto pa extende e servicionan y actividadnan den e club. Pero cu e ta interesa, esey sigur! “Mi ta kere cu nos ta hunga un rol hopi importante pa e adultonan mayor den nos comunidad, y sigur lo kier expande esaki na mas area”, Nicolaas a menciona.