E super heroenan di KPA, Ambulance, Brandweer hunto cu CMO a celebra Dia di Derechonan di Mucha

E super heroenan di KPA, Ambulance, Brandweer hunto cu CMO a celebra Dia di Derechonan di Mucha

Liberato Hoek, hefe di Ambulance:

  • Un proyecto cu a cuminza nuebe aña pasa 

ORANJESTAD (AAN)- Riba Diabierna, DIARIO a entrevista señor Liberato Hoek, Hefe di Servicio di Ambulance, relaciona cu e programa cu w programa cu nan a prepara pa celebra e Dia Internacional di Derecho di Mucha, y e Dia Nacional di Mucha, locual nan ta conmemorando tur dia 20 di November for di nuebe aña pasa.

   “Eigenlijk esaki ta nos di nuebe aña, y esaki ta un proyecto cu a cuminza entre Cuerpo Policial, Ambulance y Brandweer. Esaki a crece bira mas grandi, hunto cu aworaki CMO (Oficina di Maneho di Crisis), Kustwacht y Arumil. Kustwacht y Arumil no por ta presente awe pa motibo di traba, pero ta algo cu nos a haci pa e muchanan”, Liberato Hoek a menciona.

   El a agrega cu ta un grupo grandi di mas of menos 45 persona cu ta haci esaki posibel. “Y e meta principal pa haci esaki ta inspira e muchanan pa e tipo di profesionnan aki. Principal ta cu e muchanan bira contento. Nan ta mira nos bisti aworaki como ‘super heroes’ y mi ta kere cu cada mucha den e edad aki tin un super heroe den nan curazon. Di nos banda, cu nan tas wak por ehemplo polis, ambulance, brandweer como hende pa yuda nan, y eigenlijk nos kier pa nan wak nos como nan amigo, pues ora cu algo pasa nos tey pa yuda nan”, Liberato Hoek a expresa.

Hoek a relata cu practicamente a tuma nan seis aña pa bay tur scol rond di Aruba, pero “den un dia no por a haci tur, y esey a trece cu ne cu aña pasa, y aworaki tambe nos a haci un show extra na Harbour Arena pa 1’or y mey. Esey pa e muchanan di e scolnan cu nos no a bishita. Esey ta loke nos por a haci pa nan aworaki”, Liberato Hoek a señala.

Finalmente, e Hefe di Servicio di Ambulance, señor Liberato Hoek a reitera su gratitud na tur e departamentonan cu a haci esaki  posibel, y cu sin colaboracion di e personal aki esaki lo no tabata posibel. “Y den nomber di tur e super heroenan, nos kier a felicita tur nos muchanan riba nan dia awe!” Asina,  super heroe Liberato Hoek a expresa.